Kreu i PSD-së, Dardan Molliqaj ka ndarë me ndjekësit e tij në Facebook “pyetjet e ndaluara” të drejtuara kreut të LVV-së, Albin Kurt. Sipas Molliqajt, janë disa pyetje të cilat nuk po i bëhen Kurtit.
“Pyetjet e ndaluara. Janë ca pyetje që nuk po i bëhen Albin Kurtit nga gazetarët e përzgjedhur prej tij për ta intervistuar. Janë ca pyetje që tregojnë thelbin e qeverisjes së tij. Thelb që Albin Kurti do ta fshehë. Janë disa pyetje që nuk po i bëhen atij, sepse tregojnë të vërtetën e zhveshur”, ka shkruar Molliqaj në “Facebook”.
Postimi i tij i plotë:
PYETJET E NDALUARA
Janë ca pyetje që nuk po i bëhen Albin Kurtit nga gazetarët e përzgjedhur prej tij për ta intervistuar. Janë ca pyetje që tregojnë thelbin e qeverisjes së tij. Thelb që Albin Kurti don ta fshehë. Janë disa pyetje që nuk po i bëhen atij, sepse tregojnë të vërtetën e zhveshur.
– A do ta vendosë Albin Kurti reciprocitetin me Serbinë?
– Cilat janë kushtet që Serbia duhet t’i plotësojë në mënyrë që Albin Kurti të ulet në negociata?
– Kush janë oligarkët në Kosovë? Emrat? Cilat do të jenë veprimet e Albin Kurtit kundër këtyre oligarkëve? Pse nuk ka në programin e tij tatim në dividentë (që nënkupton tatim në fitim të aksionarëve të kompanive)?
– A do ta ndryshojë Albin Kurti ligjin i cili ia ndaloi kandidimin për zgjedhje apo do ta përdorë atë për të disiplinuar kundërshtarët politikë?
– A do ta zgjedhë VV dhe Albin Kurti presidentin/en nëse kuorumi për këtë votim varet nga prania e Listës Srpska?
– Pse e ka hequr VV dhe Albin Kurti tatimin progresiv nga programi i kësaj partie?
– Pse ka futur Albin Kurti në listë kandidatë homofobë që qartazi janë deklaruar kundër të drejtave të njeriut, veçanërisht komunitetit LGBTI, nga të cilët nuk është distancuar asnjëherë?
Janë pyetje që nuk i bëhen ngase Albin Kurti zgjedhë vetë gazetarët intervistues. Prandaj ata nuk sfidojnë, veç dëgjojnë ligjërimin. Pyetjet që s’po bëhen, janë paralajmërim për llojin e pushtetit që po vjen. Pushtet që i zgjedhë vetë gazetarët e përshtatshëm, sepse do që t’i përcaktojë vetë pyetjet. Pushtet që në fakt nuk do pyetje.
