Kryeministri Edi Rama u largua mbrëmjen e së enjtes nga ambientet e Kryeministrisë, ku kishte qëndruar për disa orë, për t’u drejtuar drejt një darke zyrtare me Komisioneren për Zgjerimin, Marta Kos. Kos ndodhet në Tiranë për samitin e së premtes në Pallatin e Brigadave, ku pritet të mblidhen kryeministrat e vendeve të Ballkanit Perëndimor, në kuadër të planit të rritjes ekonomike për gjashtë shtetet e rajonit.
Pak para daljes së Ramës, edhe zëvendëskryeministrja Belinda Balluku është parë të largohet nga godina e qeverisë, por këtë herë jo me automjetin e saj zyrtar. Sipas burimeve për BW, ajo ka hyrë në Kryeministri rreth orës 12:25 dhe është larguar vetëm pas orës 20:00, pas shtatë orësh e mbyllur në zyrë.
Po sipas të njëjtave burime, Rama dhe Balluku kanë zhvilluar një takim të tensionuar, i cili është shoqëruar me debate dhe tone të larta. Vendimi i GJKKO për ta pezulluar nga detyra e bën të pamundur ushtrimin e funksioneve të saj, dhe mësohet se gjatë takimit, kryeministri i ka kërkuar dorëheqjen.
Ndërkohë, SPAK publikoi një njoftim zyrtar ku bën me dije se ndaj Belinda Ballukut është ngritur një akuzë e re, këtë herë e lidhur me tenderin e Unazës së Madhe të Tiranës, loti 4. Ashtu si në çështjen e tunelit të Llogarasë, Balluku dyshohet për favorizim të operatorëve pjesëmarrës në procedurat tenderuese.
