Ministri i Brendshëm, Pance Toshkovski, konfirmoi gjatë një konference për shtyp se deri tani janë gjetur 59 trupa të pajetë dhe se 155 të tjerë janë të plagosur, me 18 persona në gjendje kritike. Ai siguroi se autoritetet janë duke hetuar shkakun e saktë të tragjedisë dhe do të ofrojnë ndihmë për familjet e viktimave.
Drejtoresha e spitalit të Koçanit, Dr. Kristina Serafimova, deklaroi se 70 persona janë dërguar në spital, ku disa kanë mbërritur pa shenja jete. Ajo sqaroi se të plagosurit kanë pësuar djegie të rënda dhe helmim nga monoksidi i karbonit.
Identifikimi i viktimave po bëhet i vështirë, pasi disa prej tyre nuk kishin dokumente identifikimi. Viktimat janë kryesisht të rinj të moshës 14 deri në 24 vjeç, nga qytete të ndryshme, si Shkupi, Shtipi, Probishtipi dhe Koçani.
Për shkak të tragjedisë, qeveria maqedonase pritet të shpallë shtatë ditë zie kombëtare në seancën e sotme që do të mbahet në orën 16:00. Gjithashtu, është paralajmëruar një inspektim urgjent dhe i jashtëzakonshëm në të gjitha lokalet e natës, diskotekat dhe restorantet që organizojnë evente.
Dëshmitarët okularë kanë treguar për mediat se sapo dëgjuan të bërtiturat dhe panë flakët, u përpoqën të ndihmonin të mbijetuarit. Disa nga të lënduarit janë dërguar në spital me automjete private, pasi ambulancat nuk mund të arrinin në kohë për shkak të kaosit.
“Djali im shpëtoi aq persona sa mundi,” tha një grua që ndodhej pranë vendngjarjes. Ndërsa një tjetër dëshmitar shtoi: “I dërgova disa prej tyre në spital me makinë, sepse nuk kishte kohë për të pritur.”
Ngjarja ka tronditur gjithë Maqedoninë e Veriut dhe pritet që autoritetet të ndërmarrin masa të rrepta për të parandaluar tragjedi të tilla në të ardhmen.
