Ukraina ndodhet në ditën e saj të shtatë të rezistëncës ndaj pushtimit të Rusisë.
Ndërkohë që presidenti ukrainas, Volodymyr Zelensky në një video-adresim ka akuzuar Rusinë të mërkurën se po synon të “zhdukë” ukrainasit, shtetin dhe historinë e tyre. Lideri ukrainas ka thënë se sulmet me raketa në një zonë të masakrës së Holokaustit tregon se “për shumë njerëz në Rusi, Kievi ynë është plotësisht i huaj”.
“Ata nuk dinë asgjë për kryeqytetin tonë. Për historinë tonë. Mirëpo ata kanë urdhër për të zhdukur historinë tonë. Për të zhdukur shtetin tonë. Për të na zhdukur të gjithë neve”.
Theksojmë së kryeqyteti i Ukrainës Kievi po kalon disa orë qetësie të pabesueshme teksa në mbarë vendi po zhvillohen luftime të ashpra dhe të pamëshirshme mes forcave ruse dhe ukrainase. Një reporter i BBC, i cili ndodhet në Kiev thotë se është kaq shumë qetësi dhe heshtje saqë mund të dëgjohet dhe zhurma e erës që fryn. Madje, në Katedralen e Shën Sofisë po zhvillohet një ceremoni ku marrin pjesë të gjithë drejtuesit e kishës në qytet.
Kryeqyteti i Ukrainës mbetet operacioni kryesor luftarak i Moskës. Rusia po krijon kushte për të rrethuar kryeqytetin me përparime nga perëndimi dhe lindja e qytetit. Analistët besojnë se autokolona 64 km e gjatë ende në veri të qytetit është atje për të mbështetur një sulm nga perëndimi.
