Një ngjarje tragjike ka ndodhur dy ditë më parë në Skuraj të Kurbinit, ku një 61-vjeçar humbi jetën gjatë punës, pasi ra në makinerinë e përpunimit të inerteve, duke marrë plagë të rënda. Fatkeqësisht, ai humbi jetën në spital pas disa orësh.
Policia ka njoftuar sot se ka arrestuar pronarin e kompanisë ku punonte 61-vjeçari. K. Ll., 53 vjeç, nga Fushë Mamurrasi, akuzohet për mosgarantimin e kushteve të sigurisë në punë dhe për fshehjen e kamerave të sigurisë në objekt, me qëllim të manipulimit të ngjarjes.
Sipas hetimeve, F. H. dyshohet të ketë rënë si pasojë e shkeljes së rregullave të sigurisë në punë.
Gjithashtu, hetuesit kanë zbuluar se K. Ll. ka hequr pajisjen DVR të kamerave të sigurisë për të penguar zbardhjen e ngjarjes.
Pajisja u gjet dhe u sekuestrua nga policia si provë materiale. Hetimet vijojnë për kapjen e bashkëpronarit të subjektit dhe drejtuesit teknik të kompanisë.
