Librazhdi, Korça, Elbasani dhe Berati janë qytetet që janë përmbytur nga shiu pasditen e sotme, ku shiu ka arritur një nivel të lartë dhe mësohet të jetë të paktën në nivelin e 30 centimetrave.
Ndërkohë, në Librazhd, në urën e Murrashit, një ambulancë me të sëmurë brenda ka mbetur e bllokuar, pasi në këtë zonë ka patur edhe rënie gurësh.
Autoriteti Rrugor Shqiptar ka bërë me dije së fundmi se është larguar një pjesë e gurëve në urën e Murrashit dhe se rruga Librazhd- Elbasan është e kalueshme vetëm nga njëra korsi.
Disa orë pas reshjeve të shumta shiu, ARRSH-ja informon se në këtë rrugë ka pasur reshje me intensitet shumë të lartë dhe kanë rënë gurë.
“Ka pasur reshje shiu me intesitet shumë të lartë në në aksin rrugor Librazhd-Elbasan, për pasojë pati dhe rënië gurësh në trup të rrugës. Kompania e mirëmbajtjes është ndodhur menjëherë në terren dhe po punohet në gjithë gjatësinë pranë Murashit me fadroma dhe punëtorë. Rruga është bërë e kalueshme vetëm në 1 korsi,“- shkruhet krah fotos së publikuar nga ARRSH-ja.
