Prokuroria e Posaçme Antikorrupsion (SPAK) mbush sot 5 vite nga krijimi i saj.
Gjatë fjalës së tij, kreu i SPAK, Altin Dumani, theksoi se drejtësia nuk ka anë dhe kah dhe se nuk ka persona të paprekshëm. Dumani u shpreh se institucionet e drejtësisë do të vazhdojnë të luftojnë pa kompromis ndaj korrupsionit dhe krimit të organizuar.
“Pesë vjet më parë, shoqëria shqiptare vendosi të hedhë me besim një hap vendimtar në luftën kundër korrupsionit dhe krimit të organizuar. Prokuroria e Posaçme u krijua për të dëshmuar se të gjithë janë të barabartë përpara ligjit dhe askush nuk mund të jetë i privilegjuar prej tij. Lidhur me korrupsionin, janë 1,036 persona nën hetim, përfshirë 61 zyrtarë të nivelit shumë të lartë, nga të cilët 70% janë dërguar për gjykim.
Janë ngritur 42 skuadra të përbashkëta hetimore në bashkëpunim me partnerët ndërkombëtarë.
Deri më tani, janë sekuestruar 182 milionë euro asete të përfituara në mënyrë të paligjshme. Kemi hetuar zyrtarë të të gjitha niveleve, duke dhënë mesazhin se drejtësia nuk njeh anë apo kah dhe se nuk ka persona të paprekshëm.
Sa i përket krimit të organizuar, janë proceduar 955 persona, nga të cilët 55% janë dërguar në gjykim. Në fushën e terrorizmit, janë proceduar 29 persona, dhe 100% e tyre janë dërguar në gjykim.
Gjatë këtyre pesë viteve kemi ndëshkuar zyrtarë të lartë të të gjitha niveleve, duke treguar se korrupsioni sfidohet, krimi i organizuar vihet përpara përgjegjësisë dhe askush nuk është mbi ligjin. Ne jemi krenarë për kontributin tonë në lehtësimin e integrimit të Shqipërisë në familjen evropiane, duke respektuar dhe ruajtur standardet evropiane të zbatimit të ligjit. Misioni ynë nuk përfundon me dosjen e radhës; jemi këtu për të garantuar një sistem drejtësie të fortë, ku ligji zbatohet në mënyrë të barabartë dhe nuk është privilegj për disa apo vuajtje për të tjerët”, tha Dumani.
