Studentët që do të zgjedhin të studiojnë Mjekësi në vend këtë vit do të duhet që përtej viteve të shkollës, të punojnë edhe 5 vite për të marrë diplomën, teksa vendimi i qeverisë u argumentua si një mënyrë për të frenuar largimin e bluzave të bardha nga Shqipëria.
Ndërkohë që mjeku epidemiolog për “A2 CNN” Ilir Alimehmeti është shprehur se ky vendim po i shfaq efektet negative që tani. Alimehmeti thotë se është ulur numri i aplikimeve për regjistrime në UMT, shifra që evidentohen lehtë në krahasim e vitet e tjera kur mjekësia ka qenë dega më e kërkuar.
Sipas mjekut me këtë vendim që nuk është konsultuar me grupet e interesit, që u miratua para disa javësh në parlament po ulet numri i mjekëve të ardhshëm.
“Janë ulur me 40% aplikimet për regjistrime në Universitetin e Mjekësisë. Kjo është diçka që kishim shumë vite pa e parë, pasi mjekësia ka qenë dega më e kërkuar. Pritej të ndodhte pas asaj nisme që pati shumë debate dhe ne e kishim bërë të qartë që do t’ia kishim parë efektet. Më tej, pas regjistrimeve, do të shikojmë që niveli i personave të pranuar do të jetë edhe më i ulët në krahasim me vjet. Që do të thotë se po ulim nivelin e mjekëve të ardhshëm për shkak të këtij vendimi të pakonsultuar me grupet e interesit”, deklaron Alimehmeti.
Alimehmeti theksoi se çdo vit ka studentë që zgjedhin të studiojnë jashtë, por tani po shtyhen drejt largimit edhe ata që kanë ende shpresë se Shqipëria do të bëhet.
“Në shtator-tetor do të shikojmë një nivel më të ulët në performancën e studentëve. Do të kemi një efekt negativ që do ta vuajnë miliona shqiptarë nga një vendim i pakonsultuar nga një grup njerëzish”, tha Alimehmeti
