Një krim i mundshëm brenda një familje në Tiranë është parandaluar nga forcat e policisë së kryeqytetit. Alfred Merko, 43-vjeç, i pajisur me armë është nisur drejt banesës së ish-bashkëshortes së tij.
Synimi i tij që të vriste ish-partneren, por fatmirësisht nuk u krye, pasi policia sapo u njoftua për adresën e çiftit, parandaloi ngjarjen e mundshme kriminale.
Policia arrestoi në flagrancë shtetasin Merko, i cili tashmë do të përballet me veprat penale “Armëmbajtja pa leje” dhe “Kanosja”.
NJOFTIMI I POLICISË:
Policia parandalon një ngjarje kriminale në familje. Kanosi me armë zjarri ish-bashkëshorten, vihet në pranga 43-vjeçari. Sekuestrohet një armë zjarri pistoletë dhe municion luftarak. Sherbimet e Komisariatit të Policisë Nr.1, pas njoftimit të marrë se në Sauk, në ambientet e banesës, shtetasi A. M., po kanoste me armë zjarri ish-bashkëshorten e tij menjëherë kanë shkuar në adresën e dhënë duke parandaluar përshkallëzimin e dhunës dhe ngjarjen e mundshme kriminale.
Gjatë kontrollit të banesës, Policia gjeti dhe sekuestroi në cilësinë e provës materiale 1 armë zjarri pistoletë dhe municion luftarak. Në përfundim të veprimeve u bë arrestimi në flagrancë i shtetasit A. M., 43 vjeç, dhe materialet procedurale i kaluan Prokurorisë pranë Gjykatës së Shkallës së Parë Tiranë, për veprat penale “Armëmbajtja pa leje” dhe “Kanosja”.
