Teksa ka kaluar një vit që nga përfundimi i protestave studentore, Universiteti i Tiranës vijon të shfaqë probleme të ndryshme dhe të ngrejë pikëpyetje të dyshimta.
Së fundmi, News 24 ka publikuar një dokument të siguruar nga Administratori i Universitetit të Tiranës Skerdi Dafa, ku vihet re një trefishim i buxhetit për bileta avioni për udhëtime jashtë vendit të Rektoratit dhe 7 dekanëve për vitin 2020.
Për këtë vit parashikohen mbi 75 milionë lekë të vjetra shpenzime vetëm për bileta avioni, ndërsa në këtë relacion të paraqitur nga administratori për kreun e senatit të Universitet të Tiranës është zbardhur edhe fondi që është shpenzuar përgjatë vitit që lamë pas.
Vihet se se në vitin 2019 fondi për shpenzimet për bileta avioni ka kapur shifrat e 21 milionë lekëve të vjetra, pavarësisht se në universitet nuk ka pedagogë të huaj, apo pedagogë shqiptarë që financohen për të dhënë mësim jashtë vendit.
Kreun e shpenzimeve për 2019 e mban Fakulteti i Shkencave të Natyrës me një vlerë prej 13 milionë lekësh të vjetra shpenzime, shumë kjo që është dyfishuar për 2020, pasi shkon në 23 milionë lekë.
Administratori nuk shpjegon arsyet se përse kërkon një fond prej 75 milionë lekësh të vjetra dhe pse shpenzimet janë trefishuar brenda një viti, ndërsa mbetet për tu pare nëse Senati do ta miratojë apo jo këtë kërkesë.
