Policia franceze ka njoftuar për pjesëmarrjen e saj në një operacion europian kundër një organizate kriminale shqiptare, duke arrestuar 17 persona në disa vende si Belgjika, Zvicra, Holanda, Gjermania, Italia dhe Austria.
Një nga të arrestuarit është një furnizues kryesor i rrjeteve shqiptare që operojnë në Savoie dhe Haute-Savoie. Ky shqiptar, që banonte në Lion, organizonte importe të drogës nga Belgjika dhe Holanda, të cilat më pas shpërndaheshin në zonën e Annecy. Gjatë operacionit, policia sekuestroi 3 kg heroinë, 1 kg kokainë, dhe produkte të tjera me vlerë rreth 500 mijë euro, si dhe mbi 400,000 euro cash dhe automjete luksoze.
Në Zvicër, autoritetet arrestuan tre persona dhe sekuestruan 9 kg heroinë dhe 2 kg kokainë. Dy anëtarë të tjerë të bandës u arrestuan më parë në Holandë dhe Zvicër. Kjo organizatë kriminale merrej me trafik droge dhe grabitje me armë, dhe kishte bashkëpunuar me një grup tjetër shqiptar për të grabitur drogë në Belgjikë dhe për të kryer atentate në Shqipëri.
Në Belgjikë, policia zbuloi 100 kg drogë, armë zjarri, kimikate, uniforma policie, jelekë antiplumb dhe 265,000 euro cash. Grupi trafikonte drogë nga Amerika e Jugut dhe pastronte paratë nga ky trafik. Kërkimet u realizuan në bashkëpunim me policinë gjyqësore dhe lokale në Antwerp.
