Një tjetër incident ajror ka ndodhur vetëm katër ditë pas tragjedisë së rëndë në Ahmedabad, ku një avion i Air India u rrëzua duke shkaktuar 279 viktima.
Fluturimi AI315, me itinerar Hong Kong – Delhi, u detyrua të kthehej në aeroportin e nisjes për shkak të një problemi teknik të raportuar nga piloti gjatë fluturimit.
Avioni Boeing 787-8 Dreamliner, i njëjti model me atë të aksidentuar në Ahmedabad, u ul në mënyrë të sigurt dhe pasagjerët u evakuan sipas protokolleve të sigurisë.
Aktualisht, avioni po i nënshtrohet inspektimeve të hollësishme nga autoritetet kompetente.
Ky fluturim ishte nisur nga Hong Kongu në orën 12:00 me kohën lokale, me destinacion Delhi-n në orën 12:20 me kohën indiane.
Po ashtu, më 13 qershor një fluturim tjetër i Air India, AI379 nga Phuket drejt New Delhi, u detyrua të bëjë ulje emergjente në Tajlandë për shkak të një kërcënimi për bombë në bord. Pasagjerët u evakuan në mënyrë të sigurt, ndërsa autoritetet kanë nisur hetimet, megjithëse detaje të mëtejshme nuk janë bërë publike.
Këto ngjarje ndodhin në një moment kur hetimet për aksidentin tragjik të fluturimit AI171 në Ahmedabad vazhdojnë.
Ky aksident, ku humbën jetën 279 persona, konsiderohet si një nga më të mëdhenjtë në historinë e aviacionit indian. Vetëm një person mbijetoi nga ky përplasja fatale.
Në vijim të hetimeve janë analizuar prova të ndryshme, duke përfshirë regjistrimet e kutisë së zezë dhe një video që sugjeron se pozicioni i krahëve gjatë ngritjes mund të ketë qenë i gabuar, çka mund të ketë shkaktuar humbjen e kontrollit.
Ndërkaq, në këto ditë të errëta, kanë dalë edhe disa histori mbijetese të jashtëzakonshme. Shtatë persona, të cilët për arsye të ndryshme nuk udhëtuan në fluturimin fatkeq, shpëtuan nga kjo tragjedi.
Disa prej tyre u vonuan, të tjerë anuluan udhëtimin për arsye personale apo probleme me check-in-in, ndërsa disa ndjenë shqetësim dhe e shtynë fluturimin.
Një prej tyre, Yaman Vyas, i cili kishte planifikuar të fluturonte drejt Londrës, anuloi udhëtimin pas kërkesës së nënës së tij. Të tjerë, si Jaimin dhe Priyia Patel, u ndaluan në portë për arsye administrative dhe nuk hipën në avion, ndërsa Savji Timbadias dhe Bhoomi Chauhan humbën fluturimin për arsye të ndryshme.
Këto fatkeqësi rikujtojnë rëndësinë e sigurisë në aviacion dhe sfidat që paraqet ruajtja e standardeve maksimale në një fushë ku çdo gabim mund të ketë pasoja tragjike.
