Të paktën 39 persona kanë humbur jetën dhe më shumë se 100 të tjerë janë plagosur si pasojë e një sulmi izraelit pranë dy qendrave të shpërndarjes së ndihmave në Rripin e Gazës.
Lajmi është konfirmuar nga Mbrojtja Civile e Gazës, e cila thekson se sulmet ndodhën pranë dy strukturave humanitare, njëra në jug të Khan Younis dhe tjetra në veri të Rafahut, të administruara nga Fondacioni Humanitar i Gazës.
Fillimisht, autoritetet lokale kishin raportuar për 32 të vrarë, por bilanci u përditësua pak më vonë me shtatë viktima të tjera.
Ndërkohë, vetë Fondacioni Humanitar i Gazës e ka mohuar kategorikisht përfshirjen e strukturave të tij në incident, duke i cilësuar raportimet si “të pavërteta”.
Nga ana tjetër, ushtria izraelite i tha agjencisë AFP se në zonën e Rafahut kishte identifikuar “persona të dyshimtë” që i ishin afruar trupave ushtarake. Sipas deklaratës së saj, personat nuk iu përgjigjën paralajmërimeve për t’u tërhequr, çka çoi në përdorimin e armëve “në mënyrë paralajmëruese”.
Zyrtarë ushtarakë izraelitë kanë pranuar se janë njoftuar për viktima, ndërsa sqarojnë se ngjarja ndodhi gjatë natës, rreth një kilometër larg nga njëra prej qendrave të ndihmave, e cila në atë kohë ishte e mbyllur.
“Ngjarja është nën hetim,” bën të ditur ushtria izraelite.
