Me nisjen e sezonit turistik, qendrat verore shëndetësore të ngritura në zonat bregdetare dhe turistike në të gjithë vendin po përballen me një fluks të lartë qytetarësh dhe pushuesish.
Vetëm në dy javët e para të funksionimit, janë kryer mbi 4600 vizita mjekësore, ndërsa rastet variojnë nga virozat dhe pickimet, te hipertensioni dhe urgjencat kardiake.
Në total janë 36 qendra të hapura, të shtrira në zonat me frekuentim të lartë, të cilat ofrojnë shërbim 24 orë në ditë për të gjithë, vendas apo të huaj.
Sipas Jeta Dedës, drejtoreshë e Operatorit të Shërbimeve të Kujdesit Shëndetësor, qendra më e ngarkuar ndodhet në Kishën e Shna Ndout, e ndjekur nga ato në Shëngjin dhe Velipojë.
“Diagnoza më e shpeshtë është ajo e hipertensionit arterial, gastroenteritet, pickime, alergjitë, virozat. 10% kanë dalë pozitiv me Covid. Ata që i janë drejtuar qendrës, 70 raste që i janë referuar spitaleve bashkiake-rajonale. 2500 vizita ambulatore. Afro 500 ndërhyrje mikrokirurgjikale”, deklaron Deda.
Rëndësia e këtyre qendrave është theksuar edhe nga rastet emergjente të menaxhuara në kohë.
Një 70-vjeçare në Shëngjin i shpëtoi vdekjes falë ndërhyrjes së menjëhershme të stafit mjekësor.
“Është afruar në qendrën shëndetësore. Është vlerësuar që ka pasur përfshirje posteriore dhe laterale që është një nga infarktet më të rrezikshme. Është çuar në spitalin e Lezhës ku i është shpëtuar edhe jeta.” – tha Deda.
Shërbimi shëndetësor është falas edhe për të huajt, të cilët këtë vit përbëjnë një përqindje të lartë të pacientëve të trajtuar.
“Si vendasit edhe të huajit mirëpriten falas. Vitin e shkuar e mbyllëm bilancin me 32 për qind pushues të huaj që morën shërbim. Tani kemi një përqind prej afro 24 për qind vetëm në dy javë,” – shprehet drejtoresha e OSHKSH.
Për të garantuar mbulimin e vijueshëm të shërbimit, janë angazhuar 227 mjekë dhe infermierë, ndërsa përballja me fluksin mbështetet nga një listë pritjeje me aplikantë që aktivizohen menjëherë në rast mungesash.
“Duke qenë se vjet kanë qenë 300 aplikantë, këtë vit kemi 600 të tillë. Duke krijuar kështu një listë pritjeje ku sa herë kemi vakanca që mund të krijohen për shkak se një mjek apo infermier nuk dëshiron të japë shërbim në këto qendra verore, ne jemi të mundur se brenda 3 orëve ta zëvendësojmë,” thekson Deda.
Qendrat do të vijojnë të jenë në funksion deri më 30 shtator, duke ofruar kujdes të specializuar për çdo nevojë shëndetësore të pushuesve, një model që vitin e kaluar kulmoi me mbi 80 mijë vizita, ku 32% i përkisnin shtetasve të huaj.
