Ministria e Mbrojtjes ka njoftuar për situatën e rënduar nga zjarret në vend gjatë 24 orëve të fundit, ku janë raportuar 34 vatra zjarri, nga të cilat 8 mbeten ende aktive, ndërsa 3 janë në monitorim të vazhdueshëm.
Zonat më të prekura sipas ministrisë janë qarqet Shkodër, Lezhë, Dibër, Elbasan dhe Gjirokastër.
Në zonën e “Majës së Paliskës” mbi fshatin Dukat, ndërhyrja e dy helikopterëve të Forcës Ajrore solli përmirësim të përkohshëm, por gjatë mbrëmjes zjarri u riaktivizua, duke e detyruar zjarrfikësit të qëndronin në monitorim gjatë gjithë natës.
Sot, përveç forcave vendore, në terren janë angazhuar edhe 40 efektivë të Forcave të Armatosura, ndërsa pritet ndërhyrje ajrore me një helikopter të FA.
Ndërkohë, avioni kroat “Canadair”, i angazhuar për shuarjen e zjarrit, ndihmoi në përmirësimin e situatës, por zjarri nuk u shua plotësisht.
Një tjetër vatër shqetësuese është ajo në zonën e “Përroit të Zi”, ku dje ndërhyrja e avionit kroat frenoi përhapjen e flakëve drejt disa banesave dhe staneve, por temperaturat e larta dhe era e vështirësuan vënien nën kontroll të vatrës me perimetër të gjerë. Punimet për shuarjen vijojnë edhe sot.
Pasditen e djeshme u raportua një riaktivizim i fuqishëm i flakëve nga zona kufitare me Mirditën. Për sot në terren do të angazhohen dy helikopterë hungarezë dhe avioni Canadair kroat, në kuadër të Mekanizmit Evropian të Mbrojtjes Civile.
Në total, për menaxhimin e situatës janë angazhuar:
• 40 automjete zjarrfikëse
• 776 forca operacionale vendore dhe qendrore
• 215 efektivë të Forcave të Armatosura
• 1 helikopter i FA
• 1 avion Canadair kroat
• 2 helikopterë hungarezë
Operacionet vijojnë në disa vatra me intensitet të lartë, ndërsa autoritetet po mbajnë situatën nën vëzhgim të vazhdueshëm.
