Spitali Onkologjik në Tiranë prej 33 ditësh nuk ofron shërbimin e brakiterapisë, pasi pajisja e posaçme ka dalë jashtë funksionit për shkak të mungesës së mirëmbajtjes teknike. Ky shërbim është jetik për pacientet me kancer gjinekologjik.
Gazetari Osman Stafa ka ngritur publikisht alarmin, duke e cilësuar situatën “kriminale” dhe një dëm të drejtpërdrejtë për pacientët. “Kanceri nuk pret tendera”, shkruan ai, ndërsa kritikon ashpër neglizhencën institucionale dhe paaftësinë për të garantuar funksionimin e aparaturës.
“Prej 33 ditësh me radhë, pajisja e brakiterapisë në Spitalin Onkologjik është jashtë funksionit. Shkak është mosbërja e procesit të mirëmbajtjes. Pse nuk iu bë dhe pse nuk i bëhet mirëmbajtja e kësaj pajisjeje? Kush është përgjegjës? Për shkak të kësaj neglizhence, gratë që vuajnë nga kanceri gjinekologjik nuk marrin shërbimin e nevojshëm”, ka theksuar Stafa.
Ai ka akuzuar drejtpërdrejt institucionet përgjegjëse, duke thënë se “kanceri nuk njeh burokraci dhe as paaftësinë kriminale të atyre që e kanë kthyer shëndetësinë në çiflig personal”. Sipas tij, në çdo vend normal, ministri i Shëndetësisë do të kishte dhënë dorëheqjen që në ditën e parë të mosfunksionimit të pajisjes.
“Është e papranueshme, kjo është kriminale. Turp!”, e ka përfunduar reagimin e tij gazetari.
