Ditën e sotme më shumë se 32 mijë maturantë do të ulen për herë të fundit në bankat e shkollës, pasi do të zhvillojnë provimin e fundit, atë të lëndëve me zgjedhje.
Edhe këtë herë, nxënësve do u duhet të respektojnë masat e sigurisë kundër Covid-19, pasi një shtim i rasteve është vënë re ditët e dundit në vendin tonë.
Dy ditë më parë u raportua për 82 raste të reja të infektuar nga koronavirusi, e ndërsa ditën e djeshme Ministria e Shëndetësisë u shpreh se pati vetëm 50 raste të prekur me Covid-19 në 24 orët e fundit.
Njësoj si në provimet e shkuara, të gjitha pyetjet e dy provimeve të lëndëve me zgjedhje do të jenë me alternativa dhe koha në dispozicion do jetë 2.5 orë për çdo test.
Më herët nxënësit zhvilluan provimin e anglishtes, Gjuhës Shqipe e Letërsisë dhe më pas provimin e matematikës.
Për provimin e Gjuhës Shqipe dhe Letërsisë maturantët ngritën shqetësime për cilësinë e tezës dhe kanë kërkuar që disa pyetje të mos llogariten në rezultatin final.
Ministria e Arsimit është shprehur se shqetësimet e maturantëve i ka dëgjuar, por sërish nuk ka plotësuar të gjitha kërkesat e tyre.
