Sot shënohen 31 vite nga masakra e Peshkëpisë, një ngjarje tragjike që ndodhi në postën kufitare, ku humbën jetën kapiteni Fatmir Shehu dhe ushtari Arsen Gjini.
Për këtë masakër nuk ka pasur ende dënime, ndërkohë që aktivistët vazhdojnë të kërkojnë drejtësi.
Një nga aktivistët theksoi: “Kush është kryekrimineli? Kush fshihet pas Fredi Belerit? Kush e emëroi atë për kryetar bashkie?”
Fredi Beleri ka qenë shpesh në qendër të akuzave për ngjarjen e Peshkëpisë, që ndodhi kur një grup i dyshuar kriminal grek sulmoi postën kufitare shqiptare, duke vrarë kapitenin Shehu dhe plagosur katër të tjerë.
Masakra e Peshkëpisë
Më 10 prill të 1994 u realizua masakra e përgjakur nga skuadro komanda “Pirro 1”, e cila përbëhej nga 7 persona të armatosur me armatim të ushtrisë greke. Autorëve të sulmit të quajtur organizata “MAVI”, u janë gjetur armët e grabitura të postës kufitare dhe janë dënuar nga drejtësia greke vetëm për “armëmbajtje pa leje” edhe pse ata vranë dy persona. Organizata ‘MAVI’ njihet si terroriste në Greqi.
Gjatë sulmit komandoja terroriste mori peng dhe një nga ish-nënoficerët e këtij reparti kufitar Qemal Stroka, i cili më pas u la i lirë në kufi. Gjatë rrugës ndaj Strokës është ushtruar dhunë fizike çka solli dhe tronditjen e fortë psiqike.
Gjatë largimit komando greke mori me vete edhe armët luftarake që ishin në depon e repartit. Pasi u ngjitën në qafën sipër repartit dhe kaluan shpatin e malit Bureto, autorët e sulmit e liruan nënoficerin shqiptar dhe e lanë atë të kthehet pas.
Brenda pak minutash komando, me emrin e koduar të mbretit të lavdishëm të Epirit, “Pirro i Parë” u rikthye serish në territorin grek për të humbur në errësirën e natës.
Ndërsa rekrutët e rinj të repartit të Peshkëpisë shpejtuan t’i jepnin ndihmën e parë shokut të tyre Arsen Gjini dhe komandantit Fatmir Shehu, por gjithçka ishte e kotë. Komando e frontit për çlirimin e Vorio Epirit ia kishte arritur qëllimit.
