Ditën e hënë rreth 31 mijë maturantë do rikthehen në bankat e shkollës për të ripërsëritur njohuritë e marra deri para mbylljes së shkollave më 9 mars, për provimet e Maturës Shtetërore.
Ministrja e Arsimit Besa Shahini ka treguar përmes një foto-albumi të postuar në rrjete sociale, se shkollat duke nënvizuar se ato janë gati për të mirëpritur maturantët.
“Të gjitha shkollat gati për të mirëpritur maturantët ditën e hënë”, shkruan Shahini krah fotove.
Disa javë më parë Ministria vendosi rikthimin e maturantëve nëpër shkolla duke ndjekur rregulla shumë strikte të distancimit social dhe mbajtjes së higjienës.
Sipas Shahinit, çdo shkollë do të ketë sinjalistikë të brendshme e të jashtme për orientimin e nxënësve dhe për secilën bankë do të ketë dezinfektantë dhe do të qëndrojë vetëm një nxënës, teksa bankat në klasë janë të vendosura në mënyrë të atillë që garantojnë distancimin fizik mes nxënësve e mësuesve.
Nëpër shkolla do të jenë të afishuara gjithashtu postera që lidhen me distancimin social, rregullat e qëndrimit në shkollë, higjienizimin, kujdesin që duhet treguar për larjen e duarve etj.
