Tre nga pesë shtetasit shqiptarë që u evakuan nga Izraeli kanë mbërritur tashmë në Tiranë dhe ndodhen në gjendje të mirë shëndetësore.
Lajmi u konfirmua këtë të martë, më 18 qershor, nga Ministria për Evropën dhe Punët e Jashtme, e cila tha se të gjithë shtetasit janë nxjerrë me sukses nga zona e rrezikut.
Sipas njoftimit zyrtar, mëngjesin e sotëm pesë shqiptarët u larguan nga Egjipti, ku kishin kaluar një ditë dhe udhëtuan drejt Greqisë.
Tre prej tyre u nisën menjëherë për në Shqipëri dhe kanë mbërritur në kryeqytet, ndërsa një tjetër pritet të arrijë në mbrëmje. Personi i pestë është rezident në Greqi dhe ka zgjedhur të qëndrojë atje.
“MEPJ, përmes ambasadave të saj në rajon, ka ndjekur në çdo hap procesin e evakuimit të pesë qytetarëve shqiptarë nga Tel Avivi, të cilët kanë arritur shëndoshë e mirë në Athinë. Tre ndodhen tashmë në Tiranë, një tjetër pritet të mbërrijë sonte, ndërsa i pesti do të qëndrojë në Greqi si rezident,” njofton Ministria.
Shtetasit shqiptarë ndodheshin në Izrael për arsye pune dhe turizmi kur shpërthyen sulmet iraniane, çka detyroi autoritetet shqiptare të ndërhyjnë për evakuimin e tyre të sigurt.
