Ambasadorët po zhvillojnë një takim me dyer të mbyllura me krerët e institucioneve në Shqipëri, ndërsa na ndajnë 3 ditë nga zgjedhjet e 25 prillit. Ambasadorja amerikane Yuri Kim dhe ambasadori i Bashkimit Evropian në Shqipëri Luigi Soreca , kane mbërritur para pak çastesh në Komisionin Qendror të Zgjedhjeve.
Mësohet se ata do të zhvillojnë një takim me kreun e KQZ-së, Ilirjan Celibashi. Takimi vjen pas tensionit që është krijuar në vend në prag të zgjedhjeve të 25 prillit. Kujtojmë se një ditë më parë në qytetin e Elbasanit u vra me armë zjarri militanti i Partisë Socialiste, Pjerin Xhuvani dhe mbetën të plagosur 4 person, mes të cilëve edhe një efektive e forcave “Shqiponja”. Nëpërmjet një mesazhi ditën e sotme reagoi edhe ambasadorja Yuri Kim, e cila me një mesazh në Twitter, tha se ata që shkelin të drejtën e qytetarëve për të votuar lirshëm duhet të hetohen dhe askush nuk duhet të përjashtohet dhe nuk duhet të jetë mbi ligjin.
Ndërkaq kreu i KQZ-së Celibashi bëri me dije se janë shpërndarë materialet zgjedhore në disa qarqe. “Sot, përfundon shpërndarja e materialeve zgjedhore për qarqet Vlorë, Shkodër, Dibër, Gjirokastër, Korçë, Kukës, Fier, Berat. Nesër do të shpërndahen në Tiranë, Elbasan, Durrës & Lezhë. Në çdo QV do të ketë shabllonë (për FV ) në alfabetin braille për votuesit që nuk shikojnë”, tha më herët kreu i KQZ.
