Tre deputetë të Kuvendit të Shqipërisë, Kostaq Papa, Fatjona Dhimitri dhe Ervis Meço, të ardhur në Kuvend nga listat e Partisë Demokratike, rezultojnë se përfitojnë çdo muaj rreth 300 USD, për rimbursim qiraje banese, në mënyrë të dyshimtë, raporton Shqiptarja.com.
Ata pretendojnë se jetojnë në banesa me qira në Tiranë, por nga ana tjetër kanë deklaruar se kanë banuar në kryeqytet para se të merrnin mandatin e deputetit.
Sipas vendimit nr. 114/2014 për mënyrën e trajtimit të deputetëve parashikohet që Kuvendi të mbukojë shpenzimet për strehimin në masën 35,000 lekë në muaj, vetëm të deputetëve, të cilët nuk banojnë në rrethin e Tiranës.
Sipas këtij vendimi, deputetët me banim në rrethet Tiranë, Durrës, Elbasan, Kavajë, Peqin, Krujë dhe Lezhë përjashtohen nga përfitimi i rimbursimit të qirasë.
Deputeti Kostaq Papa në formularin e dekriminalizimit që ka dorëzuar në Komisionin Qendror të Zgjedhjeve, në vitin 2017, kur Lulzim Basha e kandidoi për deputet, ka deklaruar se banon në lagjen ‘Ali Demi’ në Tiranë.
Edhe deputetët Fatjona Dhimitri dhe Ervis Meço, në formularët e dekriminalizimit të dorëzuar në KQZ në vitin 2017, kanë deklaruar se banojnë në Tiranë, pa specifikuar lagjen dhe emrin e rrugës.
Tre ligjvënësit duket se përfitojnë pagesën e qirasë në kundërshtim me vendimin 114/2014 mënyrën e trajtimit të deputetëve, pasi rezultojnë banorë në Tiranë para se të merrnin mandatin.
Kuvendi u paguan 20 deputetëve nga 35 000 lekë në muaj pagesë për strehim në banesa me qira në Tiranë.
17 ligjvënës kanë deklaruar se kanë lindur dhe banojnë në rrethe të largëta, duke qenë formalisht në përputhje me vendimin 114/2014.
Perfitimi i deputeteve per bonusin e qirase
Formular deklarimi i deputete Kostaq Papa
Formular deklarimi i deputetes Fatjona Dhimitri
Formular deklarimi i deputetit Ervis Meco
