Pagesat e larta për koncesionet e sterilizimit në shëndetësi kanë kushtëzuar investimet në këtë sektor.
Sipas burimeve zyrtare nga Fondi i Sigurimit të Detyrueshëm të Kujdesit Shëndetësor, shpenzimet për shërbimin e sterilizimit të kryera nëpërmjet skemës së Partneritetit Publik Privat, ishin 2 miliardë lekë për 2018-ën, shkruan “Monitor”.
Kjo shifër ishte 28.3% më shumë sesa plani prej 1 miliardë e 560 milion lekësh që ishte programuar në buxhetin e vitit 2018.
Në raportin e posaçëm për ecurinë e të ardhurave dhe shpenzimeve për 2018-ën, Fondi ka arsyetuar se programi i investimeve u ndryshua nga pamundësia për realizimin e sistemeve informatike të parashikuara.
Faturat e sterilizimit e kanë kaluar me 3.6 milion euro planin e financimeve në buxhet.
Sipas të dhënave zyrtare, koncesioni i sterilizimit ka zënë 5.1% të shpenzimeve totale në shëndetësi.
Kontrata e koncesionit të sterilizimit, ka hyrë në vitin e tretë të zbatimit saj, por ka shfaqur defekte serioze në parashikimin e kostove.
Vitin e kaluar qeveria pagoi kompaninë “Sani Servis” me 1.625.300 lek, ose 4% më shumë sesa plani në buxhet. Ndërkohë fatura e vërtetë i ka kaluar 2 miliardë lekët.
Kjo kompani raportoi 2.1 milion euro fitime për 2018-ën, duke i rritur të ardhurat me 1.7 miliardë lekë.
“Sani Servis” ka fituar koncesionin e sterilizimit për periudhën 2016-2025, me një total prej 12.3 miliardë lekësh.
Pagesat për operacionet janë, 37.700 lekë për ndërhyrjet me intensitet të lartë, 22.300 lekë për ndërhyrjet me intensitet të mesëm, dhe 13.900 lekë për ndërhyrjet me intensitet të ulët.
Kostot e sterilizimit kanë kaluar ato të operacionit dhe për ekspertët e shëndetësisë kjo është absurde.
