Në dy ditët e fundit, të paktën 29 persona, përfshirë fëmijë dhe të moshuar, kanë humbur jetën nga uria në Rripin e Gazës, njoftoi ministri i Shëndetësisë i Autoritetit Palestinez, Majed Abu Ramadan.
Kjo situatë dramatike ndodh ndërsa ofensiva ushtarake izraelite është intensifikuar, duke shkaktuar vdekjen e së paku 52 personave të tjerë që nga fillimi i sulmeve të ditës së djeshme.
Krizën humanitare në këtë territor të rrethuar e përkeqëson mungesa e furnizimeve, megjithëse ka pasur përpjekje për të dërguar ndihma urgjente.
Sipas Zyrës për Koordinimin e Çështjeve Humanitare të OKB-së, nga rreth 200 kamionë me furnizime ushqimore dhe mjekësore, vetëm afërsisht 90 janë lejuar të hyjnë në Gaza.
Megjithatë, shpërndarja e tyre brenda territorit mbetet e vështirë për shkak të pasigurisë, rrezikut të plaçkitjeve dhe mungesës së koordinimit me autoritetet izraelite.
Gjysmëhëna e Kuqe Palestineze ka bërë me dije se shumica e këtyre kamionëve po bllokohen ende në pikën kufitare të Kerem Shalom dhe ndihmat nuk kanë arritur ende tek civilët që kanë nevojë më të madhe.
Presidenti i organizatës, Younis al-Khatib, tha se ndërsa kamionët janë nën inspektim, ata nuk janë futur brenda në Gaza. Ai paralajmëroi se mungesa e logjistikës dhe rreziku i shpërthimeve të dhunshme mund të sjellin pasoja katastrofike për banorët.
Prej muajsh, mjekët dhe organizatat humanitare kanë paralajmëruar për përkeqësimin e situatës së kequshqyerjes në Gaza, ku furnizimi me ushqime është i kufizuar, ndërsa çmimet janë rritur ndjeshëm.
Mbyllja e furrave të bukës dhe mungesa e gazit për gatim po shtojnë vështirësitë e përditshme për banorët e këtij territori.
Sipas një raporti të Klasifikimit të Fazave të Sigurisë Ushqimore, rreth 71,000 fëmijë nën pesë vjeç janë në rrezik të kequshqyerjes akute, me mbi 14,000 raste të rënda të parashikuara gjatë 11 muajve të ardhshëm.
Ndërsa rritet presioni ndërkombëtar ndaj Izraelit për të lehtësuar bllokadën dhe për të lejuar hyrjen e ndihmave humanitare, furnizimet që kanë arritur janë ende larg asaj që nevojitet për të adresuar këtë krizë në rritje dhe për të shpëtuar jetët e civilëve të pafajshëm.
