Policia jep versionin zyrtar për ngjarjen e përgjakshme që ndodhi në 11:20 në komunën Dajç të Shkodrës.
Nga disa të shtëna armësh (në vendngjarje u gjetën 30 gëzhoja automatiku, plot 1 karikator AK-47), mbeti i vrarë 46-vjeçari Ridvan Ramazani. Policia tha se arriti të zbardhë ngjarjen dhe të identifikojë autorët e dyshuar. Bëhet fjalë për Vëllezërit Duel dhe Hydajet Mehmedaj.
Burime nga policia bëjnë me dije se janë arrestuar deri tani tre persona, mes tyre një nga vëllezërit, si dhe janë shpallur në kërkim dy të tjerë që mendohet se kanë lidhje me ngjarjen, dhe akuzohen për moskallëzim krimi.
Ngjarja e rëndë ndodhi pranë një pike karburanti në afërsi të fshatit Mushan të Shkodrës. Dy persona të cilët udhëtonin me motor kanë ekzekutuar Ramazanin i cili ishte në makinën e tij tip “BMË X5”, xhamat e së cilës janë bërë shoshë në plumba. Pavarësisht se pika e karburantit ishte e pajisur me kamera sigurie, ato nuk funksiononin dhe nuk kanë arritur të regjistrojnë të gjithë skenën e krimit. Autorët e dyshuar gjatë paradites ishin konfliktuar me djalin e viktimës dhe më pas Ramazani ka ndërhyrë për të sqaruar situatën dhe për pasojë ka mbetur i vrarë me armë zjarri.
Ridvan Ramazani, njihej si “i forti” i fisit Ramazani në Shkodër, familja e të cilit ka pasur konflikte me një tjetër fis, atë të Edmir Koçisë. Ky i fundit është vrarë në të njëjtën datë si sot 8 vite më parë në lagjen “Tepe” në Shkodër, ku është goditur në orët e mbrëmjes të 28 nëntorit, ndërsa ka ndërruar jetë në spital një ditë më vonë. Ramazani, për policinë e Shkodrës ka qënë një ndër personat kryesorë të dyshuar në vrasjen e Edmir Koçisë. Me sa duket goditja në të njëjtën datë është një mesazh i qartë dhe kuptimplotë që të çon në dyshimin e arsyeshëm se vrasjen e Ridvan Ramazanit, e ka kryer grupi i Edmir Koçisë. Me goditjen e Ridvan Ramazanit, pa dyshim që situata kriminale në Shkodër do sjellë përkeqësim. Autorët ishin përgatitur në detaje për këtë atentat, pasi kanë pritur viktimën sapo ai të dilte nga banesa dhe hynte në rrugën e fshatit Dajç. Sipas burimeve, në momentin që Ridvan Ramazani ka ulur shpejtësinë për tu futur në rrugë, në zonë është shfaqur një motor, ku nga njëri prej personave në të, është lëshuar breshëri automatike, në pjesën ballore të makinës së Ridvan Ramazanit dhe pjesën e majtë.
Njoftimi i policisë:
Zbardhet ngjarja e ndodhur mesditën e sotme në fshatin Mushan.
Identifikohen autorët dhe vijon puna për kapjen e tyre.
Strukturat hetimore të DVP Shkodër, të mbështetura nga specialistët për Hetimin e Krimeve të Rënda në Departamentin e Policisë Kriminale, nën drejtimin e Prokurorisë së Rrethit Gjyqësor Shkodër, falë reagimit në kohë dhe kryerjes së veprimeve të shpejta, profesionale dhe hetimore, bënë të mundur që brenda një kohe të shkurtër të zbardhnin dhe dokumentonin ngjarjen e ndodhur rreth orës 11:20, në fshatin Mushan, Shkodër, në afërsi të një pike karburanti, ku u gjet i vrarë me armë zjarri brenda në makinë, shtetasi R. H., 46 vjeç, banues në fshatin Darragjat, Shkodër.
Nga tërësia e veprimeve hetimore dyshohet se ngjarja ka ndodhur për motive të dobëta. Autorët e dyshuar gjatë paradites ishin konfliktuar me djalin e shtetasit R. H. dhe më pas dyshohet se ky shtetas ka ndërhyrë për të sqaruar situatën dhe për pasojë ka mbetur i vrarë me armë zjarri.
Shërbimet e Drejtorisë Vendore të Policisë Shkodër, të mbështetura nga FNSH dhe Focat Speciale Renea, nën drejtimin e prokurorit, kanë ushtruar disa kontrolle banesash dhe ambientesh të ndryshme ku dyshohej se mund të fshiheshin autorët.
Ndërkohë, shërbimet e Policisë po vijojnë krehjen e zonës për të bërë të mundur lokalizimin, kapjen dhe arrestimin e autorëve të dyshuar, të cilëve, për arsye hetimore, për momentin nuk iu bëjmë me dije gjeneralitetet.
Gjithashtu, në bashkëpunim me DVP Lezhë vijojnë pikat e kontrollit në akset rrugore, me qëllim kontrollin e imtësishëm të personave të dyshuar, për të mos iu lënë mundësinë që të largohen më drejtim të qarqeve të tjera.
/GazetaReforma.com/
