Sot, më 28 Nëntor, Shqipëria kremton 112-vjetorin e Pavarësisë, një ngjarje historike që shënon shpalljen e shtetit të pavarur shqiptar.
Më 28 nëntor 1912, Ismail Qemali ngriti flamurin kombëtar në Vlorë, duke kurorëzuar luftën dhe përpjekjet shekullore të shqiptarëve për liri.
Në këtë ditë, Kuvendi Kombëtar shpalli Pavarësinë dhe emëroi Ismail Qemalin si kryetar të Kuvendit dhe të Qeverisë së Përkohshme, duke kërkuar njohjen ndërkombëtare të Shqipërisë si shtet sovran.
Për këtë ditë historike, autoritetet organizojnë një sërë aktivitetesh festive. Në Vlorë do të mbahet ceremonia tradicionale e ngritjes së flamurit, ndërsa në Tiranë do të zhvillohet “Parada Kuqezi” që do të fillojë në orën 11:00 nga sheshi “Nënë Tereza”, duke kaluar përmes Bulevardit “Dëshmorët e Kombit” dhe përfunduar në sheshin “Skënderbej”.
Për këtë vit, parakalimi do të përfshijë rreth 10,000 pjesëmarrës nga diaspora, duke sjellë një ndjenjë uniteti dhe krenarie kombëtare.
Një tjetër aktivitet i veçantë do të jetë Panairi i Artizanëve, i cili do të zhvillohet te Pazari i Ri, duke prezantuar një gamë të gjerë produktesh artizanale, përfshirë qeramikë, bizhuteri, tekstile dhe punime druri.
Ky festival do të ofrojë mundësi për vizitorët që të shohin dhe të blejnë produkte të veçanta, duke promovuar talentet dhe artizanët shqiptarë.
Sot, shqiptarët kudo në botë nderojnë këtë ditë të shënuar, duke kujtuar sakrificat e të parëve dhe duke festuar identitetin dhe krenarinë e kombit.
