Vetëvrasja mbetet pista kryesore e hetimeve për vdekjen e 25-vjeçarit Romario Brunga, i cili u gjet i pajetë këtë të enjte në Lezhë.
Sipas grupit hetimor të ngritur nga Drejtoria e Policisë së Qarkut Lezhë, ngjarja dyshohet të ketë ndodhur rreth orës 15:00, ndërsa trupi i tij u gjet nga të afërmit dy orë më vonë.
Brunga kishte marrë një goditje plumbi në kokë, ndërsa arma e përdorur u gjet brenda automjetit të tij, e mbushur.
Ekspertiza paraprake tregon se makina nuk ka shenja dëmtimi nga jashtë, dhe as viktima nuk kishte dëmtime të tjera në trup. Këto detaje kanë forcuar dyshimet se bëhet fjalë për një akt vetëvrasjeje.
Policia vijon të marrë në pyetje familjarët dhe të njohurit e tij për të zbuluar nëse 25-vjeçari kishte pasur konflikte apo probleme të tjera.
Romario Brunga ishte martuar në gusht të vitit të kaluar, por vetëm shtatë muaj më pas vendosi t’i jepte fund jetës me një të shtënë arme.
