22-vjeçarja keniane u dhunua mizorisht në Tiranë! Ish-prokurori Beçi: Ngjarja mund të mos zbardhet kurrë

Rasti i 22-vjeçares nga Kenia është sa enigmatik aq edhe tronditës, ku teksa erdhi me shume entuziazëm në Shqipëri për të punuar, pa vdekjen me sy.

Ish-prokurori Beçi për “News24” deklaroi se në këtë rast forcat hetimore nuk kanë vepruar si duhet me mbledhjen e provave në vendngjarje pasi sipas tij nuk kanë marrë telefonat, kamerat e zonës ku u gjet e reja dhe nuk është bërë përcaktimi i njerëzve në dijeni të ngjarjes.

Gjithashtu Beçi u shpreh se të gjitha këto fakte tregojnë se gjatë hetimeve ka pasur neglizhencë që mund të sjellë mos zbardhjen kurrë të një ngjarjeje të rëndë si kjo, ndërsa deklaroi gjithashtu se kodi duhet të funksionojë në mënyrë të njëjtë për çdo shtetas në territorin shqiptar, edhe nëse janë të huaj.

Ish-prokurori po ashtu preku çështjen e përkthimit të dëshmisë në lidhje me ngjarjen ku ka rezultuar se personi që ka luajtuar këtë rol është një prej personave që kanë dëshmuar në lidhje me të, ghjë që sipas tij është totalisht kundër kodit penal.

“Kur ndodhemi përballë nja ngjarje ku një shtetas është gjetur i dëmtuar në një ambient publik kemi të bëjmë me një vendngjarje ku shkojnë forcat policore dhe mbledhin provat sipas procedurave.

Sipas procedurave një grup hetimor që shkon në vendngjarje detyrohet të japë ndihmën e parë personit të dëmtuar, pastaj fillojmë me marrjen e provave, kemi ato materiale dhe ato me dëshmitarë e shkencore. Në hapësirën e pushimit të pallatit u gjet shtetasja që kishte 30 orë aty, për të realizuar mënyrën e të provuarit të faktit se çfarë ka ndodhur të gjitha provat duhen mbledhur nga grupi hetimor. Duhet të përcaktohen personat që kanë dijeni për ngjarjen, në pallat, në hostel, etj, jo pas dy muajsh. Metoda e hetimit fillon nga vrasja, në rast se hetimi rezulton se vepra është kryer nga pakujdesia shkojmë në veprime të tjera.

Këtu është tentativë për të fshehur diçka, në çdo vendngjarje nuk janë provat standarde. Kemi mungesën e marrjes së telefonave dhe duhen marrë të dhënat e tyre, duhet të kemi kamerat e sigurisë sepse për 60 ditë prishen serverat më të mirë. Nuk kemi përcaktimin e njerëzve që kanë dijeni, të gjitha këto çojnë në neglizhencë dhe mos zbardhje kurrë të një ngjarjeje të tillë të rëndë. Kodi duhet të funksionojë për çdo shtetas qoftë edhe i huaj në territorin shqiptar.

Sa i përket përkthimit, kodi thotë që personat që nuk njohin gjuhën shqipe ndihmohen nga një përkthyes i licensuar. Përkthyesi caktohet sipas neneve ku sqarohet se përkthyes nuk mund të jetë një person që ka një rol tjetër. Një person që është marrë pyetje nuk mund të jetë përkthyes. Ai që ka luajtur rolin e përkthyesit dyshohet si autor kryesor. Në një fakt penal, mendimi i parë është te konfliktet që ka ky shtetas. Minimalisht kemi të bëjmë me paaftësi, një shtetas që nuk di gjuhën shqipe nuk mund të ndihmohet nga një shtetas që është dëshmitar i ngjarjes”, u shpreh ai.