Pas një situate tejet të vështirë që po kalon sektori i fasonerisë për shkak të pandemisë së covid-19, përfaqësues të kësaj industrie, i janë drejtuar për ndihmë qeverisë.
76 mijë punonjës në industrinë e fasonerisë në Shqipëri, përveçse qëe paguhen pak, janë një fuqi punëtore e cila për shkak të pandemisë dhe mënyrës së punës së tyre zinxhirore mund të kthehen në një “bombë biologjike” për të gjithë, tashmë rrezikojnë të mbesin pa punë, pasi për vitin 2021, i gjithë ky sektor nuk ka asnjë kontratë me vende të tjera jashtë për porosi veshjesh, këpucësh etj.
Si pasojë, fasonët kërkojnë një shumë prej 52 milionë eurosh, për të diversifikuar prodhimin, për likuiditet dhe për të kthyer prodhimin në “Made in Albania.”
Rreth 68 kompani fasonerie, janë pyetur në lidhje me këtë problematikë, të cilat për hir të së vërtetës përfaqësojnë diku te mbi 10% të totalit të 660 fabrikave që operojnë në këtë sektor.
Kjo anketë në të cilët janë pyetur punonjësit e 68 kompanive fasonerie, është zhvilluar nga shoqata “Pro Eksport Albania”.
Spas anketimit, rreth 98.5% e punonjësve të pyetur, shprehin nevojë urgjente për një paketë të tretë mbështetëse për ta nga ana e qeverisë, teksa mbi gjysma e tyre deklarojnë se janë të gatshëm të shesin biznesin pasi nuk arrijnë të përballojnë kostot dhe humbjet.
“Nevoja për diversifikuar linjën e prodhimit në bazë të bizneseve të pyetura është rreth 32 milionë euro, shtoji kësaj nevojën për likuiditet që sipas anketës ka rezultuar rreth 15 milionë euro, por dhe duke parë nevojën për lëndë të parë prej 5 mln euro në total pra kemi nevojë për një paketë 52 mln euro që të dalim me prodhimet tona dhe të vijojmë punën normalisht”, ka deklaruar përfaqësues i “Pro Eksport Albania”, Edvin Prençe.
Përballë kostove të shtuara dhe mungesës së likuiditetit për të paguar pagat e punonjësve, përfaqësuesit e sektorit deklarojnë se janë të detyruar të bëjnë sërish shkurtime nga puna edhe në vijim.
“Ne nuk kemi asnjë kontratë në horizont. Zero kontrata të reja sepse edhe partnerët tanë janë të paqartë, pra jemi në vështirësi. Në një anketë të zhvilluar pak kohë më parë rezultuan mbi 22 mijë të papunë nga fasonët. Por, nisur nga situate aktuale mendojmë se fatkeqësisht mund të bëjmë sërish shkurtime që mund të prekin rreth 7-8 mijë punonjës pasi nuk përballojmë dot kostot”, është shprehur ndër të tjera Prençe.
Ndërkohë kujtojmë se në këtë industri, industria e veshjeve e këpucëve është një ndër më të prekurat nga kriza e Covid-19.
Sipas INSTAT-it, për 11-mujorin e këtij viti eksportet e fasonëve arritën në 93.4 miliardë lekë, në rënie me 16 miliardë lekë apo 130.5 milionë euro kundrejt të njëjtës periudhë të 2019-ës.
Duke qenë se në këtë sektor, nuk ka ende asnjë kontratë të re nga vendet partnere, pritet që kjo ecuri negative e bizneseve fason, të vazhdojë minimalisht edhe për pjesën e parë të vitit 2021.
Pa dhënien e një “serumi” nga ana e qeverisë, industria e fasonerisë rrezikon që përveç 22 mijë shkurtimeve nga puna në këtë sektor, të falimentojë tërësisht./Gazetareforma.com/
