SPAK po vazhdon hetimet për ngjarjen e 21 Janarit, duke thirrur për dëshmi Agim Deda, vëllain e Hekuran Dedës, një prej 4 viktimave të mbetur në protestë.
Agim Deda u paraqit në SPAK në orën 10:00
Ditën e djeshme në Prokurorinë e Posaçme u paraqit vëllai tjetër i Hekuran Dedës, Zabit Deda, i cili deklaroi për mediat se SPAK ka përparuar hetimet për sa i përket çështjes së 21 janarit.
Vrasjen e Hekuran Dedës, ka mbetur ende pa autor, sipas vendimit të Gjykatës së Apelit.
Në përpjekje për të zbardhur ngjarjen, SPAK po shqyrton një audio regjistrim të komunikimeve të Gardës së Republikës gjatë protestës, që është dorëzuar nga gazetari Artan Hoxha dhe po analizohet për të verifikuar autenticitetin dhe për të identifikuar zërat e personave që komunikojnë gjatë hapjes së zjarrit.
SPAK ka kërkuar gjithashtu provat dhe fashikujt hetimorë të mbledhur ndër vite, dhe ka marrë në pyetje ish-drejtorin e Policisë, Hysni Burgaj, ish-zv.drejtorin Agron Kulicaj, si dhe deputetët e ish-organizatorëve të protestës nga Partia Socialiste.
Hetimet kanë nisur pas kallëzimeve të familjarëve të Aleks Nikës, një tjetër viktimë, dhe përfshijnë zyrtarë të lartë të kohës, si ish-kryeministrin Sali Berisha dhe ish-ministrin e Brendshëm Lulzim Basha.
