Një ngjarje si në filmat aksion ndodhi ditën e djeshme në zonën e ish-kënetës në Durrës.
Një makinë tip “Range Rover” u qëllua me breshëri plumbash duke filluar nga Maminasi. Ky aksion i frikshëm ka zgjatur rreth 20 minuta. I plagosur mbeti Julian Meçaj, një nga ushtarët e Lul Berishës, ish-kreut të bandës së Durrësit, por edhe dy persona të tjerë.
Njëri prej të plagosurve është edhe Plarent Dervishi, kunati i Lul Berishës. Dervishi mori 1 plumb ndërsa Meçaj 3, por të dy janë jashtë rrezikut për jetën. Mjeti me të cilin po udhëtonin është bërë shoshë nga plumbat.
Dëshmitarët okularë shprehen se ndjekja zgjati për rreth 20 minuta. Referuar sërish personave në vendngjarje, në mjetin që qëlloi drejt Range Roverit, ndodhej një person i maskuar dhe shoferi.
Mendohet se drejt makinës me të cilën ata udhëtonin u derdhën dy karikatorë kallashnikovi.
Albeu.com mëson se në momentin që ka ndodhur atentati ndaj Dervishajt dhe Meçes, drejtimin e makinës e kishte ky i fundit, ndërsa Dervishaj gjendej si pasagjer. Kanë qenë manovrat e Meçes që i kanë shpëtuar të dy nga kurthi që kishin ngritur atentatorët, të cilët bënë që t’i rezistonin sulmit prej 20 minutash nga Maminasi në hyrje të Durrësit.
