Pasi deputetja demokrate Albana Vokshi denoncoi se në QSUT kanë humbur jetën 4 pacientë të intubuar pasi u ndërpre energjia elektrike, vjen reagimi nga Qendra Spitalore ‘Nënë Tereza’. Në reagim pranohet se më 5 prill, në orën 1:30 të mëngjesit ka pasur një luhatje energjie, por sipas QSUT nuk ka pasur asnjë humbje jete. Denoncimi i Vokshit mbetet për t’u hetuar nga institucionet përkatëse, por mbetemi skeptik dhe mosbesues ndaj deklaratave të QSUT, pas deklaratës së manipuluar për zjarrin që ra në Urgjencën e sapo inauguruar të spitalit.
REAGIMI
QSUNT shpreh keqardhje për deklaratat e pavërteta në Komisionin për Punën, Çështjet Sociale dhe Shëndetësinë, të cilat afektojnë drejtpërdrejtë pacientët dhe shëndetin e tyre.
Qendra Spitalore Universitare “Nënë Tereza”, sa i takon deklaratave të bëra nga anëtarët e komisionit për ndërprerje të energjisë elektrike në një prej godinave të këtij spitali sqaron si më poshtë vijon:
Në datë 5 Prill, në orën 1:30 të mëngjesit, punonjësit teknikë të shërbimit 24 orësh kanë konstatuar luhatje të energjisë elektrike pranë Shërbimit të Reanimacionit Qendror. I menjëhershëm ka qenë reagimi i teknikëve shtesë të gatishmërisë të QSUT-së të cilët në bashkëpunim me Operatorin e Shpërndarjes së Energjisë Elektrike i kanë dhënë zgjidhje kësaj problematike duke bërë të mundur rikthimin e furnizimit me energji elektrike dhe normalizimin e situatës.
QSUT sqaron opinionin publik se nuk ka asnjë të vërtetë sikurse është raportuar ditën e sotme për humbje jete të pacientëve dhe se shërbimi ndaj tyre nuk është cenuar në asnjë moment.
