Mbrëmjen e sotme mjeku infeksionist, Arjan Harxhi, ishte i ftuar në emisionin ‘’Real Story’’, ku ka folur rreth gjendjes aktuale të vendit tonë.
Mjeku ka bërë me dije se janë dhe 4 të tjerë të shtuar në Spitalin Infektiv, teksa është shprehur se 2 nga 3 pavione tashmë janë mbushur me këto raste dhe prandaj diskutohet dhe problemi që sistemi shëndetësor nuk duhet që të mbingarkohet pasi ky virus zgjat gjatë tek pacienti.
”Pra në shërbimin infektiv është vendosur se është pjesë e strukturës së QSUT, është vendosur si vendi i parë apo shërbimi i parë për këta të sëmurë për shkak të kapaciteteve, hapësirës profesionale të personelit shëndetësor. Janë 20 të sëmurë. Janë shtruar dhe 4 raste të reja. Nga rastet e identifikuara që paraqiten për problematika të ndryshme. Dhe vlerësoj se duhen shtruar apo duhen vendosur në karantinë. Gati 2/3, apo 2 pavione nga 3 pavione po mbushen me këto raste dhe kjo është ajo për të cilën po diskutohet. Mosngarkimi në mënyrë të menjëhershme. Ky infeksion zgjat shumë. Nëse një krevat zihet është vështirë të lirohet.”- tha mjeku Arjan Harxhi.
Pasditen e sotme rektori i Universitetit të Mjekësisë Arben Gjata foli për mundësitë e përballimit të situatës nga spitalet tona në rast se do të kemi një përshkallëzim të situatës, ku shpjegoi se në rast të kalimit të kapaciteteve atëherë në dispozicion do të jetë 100 deri në 120 shtretër në Spitalin e Infektivit, ndërsa në rast të përshkallëzimit të situatës 140 shtretër janë në dispozicion në spitalin “Shefqet Ndroqi”.
Gjithashtu, sipas Gjatës 100 shtretër janë në dispozicion në ish-Urgjencën në QSUT dhe 100 tek Spitali Amerikan.
Shqipëria në “kthetrat” e Coronavirusit, ja kur epidemia do arrijë pikun në vendin tonë
Ditën e sotme Ministria e Shëndetësisë njoftoi se deri tani janë infektuar 51 persona, por së bashku me 4 rastet që bëri me dije mjeku Harxhi numri shkon në 55 të infektuar.
Ndërkohë, në Kosovë janë 15 persona të infektuar me COVID-19, teksa qeveria ka shpallur emergjencën.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
