Me përmirësimin e situatës qeveria vendosi që të gjithë fëmijët nën 6 vjeç të riktheheshin në kopshte e çerdhe duke nisur nga 1 qershori.
Mirëpo, sot, dy javë pas rihapjes së parashkollorit, është regjistruar edhe rasti i parë i infektimit të një edukatoreje, në kopshtin nr.16 në zonën e ish-Bllokut, raporton Dosja.al.
Edukatorja i ishte nënshtruar tamponit ditën e djeshme dhe sot ka rezultuar pozitive, teksa mister mbetet rruga nga është infektuar dhe nëse ia ka transportuar virusin edhe fëmijëve.
Të parët që janë lajmëruar për mbylljen e çerdhes janë prindërit e fëmijëve, ndërsa për stafin është vendosur që të vetëkarantinohen për 14 ditë.
Kujtojmë se sot në vendin tonë u shënua numri më i lartë i rasteve të reja, pasi Ministria e Shëndetësisë raportoi për 69 raste të reja.
Gjithashtu, gjatë orëve të fundit kanë fituar betejën me virusin edhe 11 persona të tjerë, teksa aktualisht në spitalin Infektiv po marrin shërbim 50 pacientë, 7 prej tyre janë në terapi intensive dhe një i intubuar.
Në vendin tonë janë aktualisht 499 persona aktivë me Covid-19.
