Një ngjarje e rëndë ka ndodhur dje në Ferizaj të Kosovës, ku dy të rinj kanë dhunuar një 18-vjeçare, deri sa kjo e fundit ka ndërruar jetë. Dy autorët janë fiksuar nga kamerat e sigurisë së spitalit pasi shoqëruan viktimën pa ndjenja, ndërsa Insajderi ka publikuar edhe foton e të ndjerës.
Njoftimi i Prokurorisë:
“Prokuroria Themelore në Ferizaj, Departamenti për Krime të Rënda, njofton opinionin publik se lidhur me rastin e vdekjes së 18 vjeçares në Ferizaj, me vendim të prokurorit, është ndaluar një (1) person i dyshuar, me inicialet A.S., në kohëzgjatje prej 48 orësh, për shkak të dyshimit se i njëjti në bashkëkryerje ka kryer veprën penale “Vrasje e rëndë” të Kodit Penal të Republikës së Kosovës (KPRK).
LEXO EDHE: Ngjarje e rëndë në Kosovë, 18-vjeçarja dhunohet fizikisht dhe ndërron jetë
Ndërsa, i dyshuari tjetër D.K., që gjendet ende në arrati, dyshohet se për motive të ulëta, ka keqtrajtuar fizikisht tani të ndjerën M.O., e cila si pasojë e lëndimeve të marra ka ndërruar jetë dhe vdekjen e saj e kanë konstatuar mjekët në Qendrën Emergjente në Ferizaj, ku me ç’rast i njëjti dyshohet se ka kryer veprën penale “Vrasje e rëndë” të Kodit Penal të Republikës së Kosovës (KPRK). Me urdhër të prokurorit, trupi i pa jetë i viktimës është dërguar për obduksion, në Institutin e Mjekësisë Ligjore.
Prokuroria Themelore në Ferizaj në bashkëpunim me Policinë e Kosovës kanë ndërmarrë të gjitha veprimet e nevojshme hetimore dhe janë duke punuar rreth zbardhjes së të gjitha rrethanave të ngjarjes”, shkruhej në njoftimin e Prokurorisë.
