Të paktën 18 palestinezë humbën jetën pas një sulmi ajror nga dronët izraelitë që goditën një njësi policore të Hamasit në Deir al-Balah, qytet në qendër të Rripit të Gazës.
Forcat e goditura, sipas burimeve në terren, ishin të veshura me rroba civile dhe maska, dhe po përpiqeshin të vendosnin kontroll mbi një treg lokal, duke akuzuar shitësit për abuzime me çmimet dhe shpërndarje të mallrave të grabitura nga ndihmat humanitare.
Ministria e Brendshme në Gaza, e kontrolluar nga Hamasi, reagoi ashpër ndaj sulmit, duke e cilësuar atë një “krim të ri” nga Izraeli kundër forcave që synonin ruajtjen e rendit publik në kushte të jashtëzakonshme.
Nga ana tjetër, kryeministri izraelit Benjamin Netanyahu deklaroi ditën e djeshme se Hamasi ka rimarrë kontrollin mbi ndihmat humanitare në veri të Gazës dhe i ka mohuar ato civilëve. Ai i dha ushtrisë një afat 48-orësh për të hartuar një plan të qartë veprimi për të parandaluar këtë situatë.
Deklarata vjen pas publikimit të një videoje të mërkurën, ku disa kamionë ndihmash shfaqeshin të shoqëruar nga burra të armatosur dhe të maskuar në zonën e Zikimit, teksa hynin në Gaza.
Hamasi, nga ana e tij, ka mohuar në mënyrë të përsëritur çdo përfshirje në keqpërdorimin ose përvetësimin e ndihmave humanitare. Tensionet mbeten të larta, ndërsa situata humanitare në Gaza përkeqësohet çdo ditë.
