Gjykata e Vlorës ka vendosur masën e sigurisë “arrest me burg” për babain e 17-vjeçares që tentoi të vetëvritej me armë zjarri, ngjarje kjo e ndodhur tre ditë më parë në qytetin bregdetar.
43-vjeçari akuzohet për “dhunë në familje” dhe “shkaktim të vetëvrasjes”. Edhe pse mbrojtja kërkoi një masë më të butë sigurie, gjyqtari Bevil Beqiraj miratoi kërkesën e Prokurorisë duke urdhëruar ndalimin e tij në burg.
E mitura u plagos rëndë në kokë, pasi qëlloi veten me armë zjarri në banesën e gjyshit. Aktualisht ajo ndodhet në gjendje të rëndë shëndetësore në Spitalin e Traumës në Tiranë.
Në hetim për këtë ngjarje është edhe gjyshi i vajzës, i dyshuar për armëmbajtje pa leje. Policia vijon kërkimet për gjetjen e armës, e cila dyshohet se është fshehur nga familjarët pas ngjarjes tragjike.
