Bashkëpunëtori i drejtësisë, Nuredin Dumani, ka vijuar dëshminë e tij përpara trupit gjykues në kuadër të procesit “Plumbi i Artë”, ku ka dhënë detaje të reja mbi komunikimet mes anëtarëve të grupeve kriminale, porositë për vrasje dhe bashkëpunëtorët në krim.
Në një pjesë të dëshmisë, Dumani foli për komunikimet me të pandehurin Erion Alibej, edhe pas arrestimit të tij. Sipas tij, Alibej kishte akses në aplikacionin e koduar Sky ECC gjatë qëndrimit në paraburgimin e Elbasanit, por pas transferimit në një tjetër institucion, kontakti mes tyre u ndërpre.
Dumani zbuloi gjithashtu se kishte marrë porosi për eliminimin e Lulzim Mashës, të cilën ia kishte përcjellë Henrik Hoxhajt përmes një telefonate. Sipas tij, porosia ishte dhënë nga Suel Çela, përmes një ndërmjetësi nga Durrësi, Fatmir Troplini.
“Henrikut i ofrova 160 mijë euro, i dhashë 10 mijë kapar. 10 mijë të tjera i mbajta për vete,” – tha Dumani para gjykatës.
“Me Suelin më lidhën përmes Fatmir Troplinit. Sueli çonte Xhino Rrokën të merrte ‘mall’ tek ata.”
Ai tregoi gjithashtu se në platformat e komunikimit të koduar përdorte pseudonimet “Alkatraz”, “Covid 19” dhe “Toto Rino”, ndërsa Hoxhaj njihej si “Baftjari”.
Nga ana e tij, Henrik Hoxhaj konfirmoi se qëllimi fillestar kishte qenë vrasja e djalit të Lulzim Mashës, por pasi ai ndodhej në Maqedoni dhe nuk u arrit të gjendej për një vit, u vendos që objektiv të bëhej vetë Masha.
“Gjithçka ishte në telefon. Djali nuk po vinte, ishte në Maqedoni. E ndiqnim me ndihmën e Aleksandër Bahos, që e njihnim si ‘Sakati’. Ai kishte 200 mijë euro me vete dhe Baho do merrte 70% të shumës,” – tha Hoxhaj.
Në vijim, Dumani mohoi që porosia të kishte qenë për djalin, duke thënë se kishte marrë përsipër të ekzekutonte Lulzim Mashën sipas marrëveshjes me Suel Çelën.
Seanca u tensionua nga një përplasje verbale mes Dumanit dhe Henrik Hoxhajt, të cilit i është hequr statusi i bashkëpunëtorit të drejtësisë. Hoxhaj e akuzoi Dumanin se po përpiqej të minimizonte rolin e tij në atentatet e planifikuara, ndërsa ky i fundit reagoi me ironi:
“Nuk më ke dhënë asnjëherë urdhra. Çfarë bën këtu si kapiten Rramiu? Të është dhënë një punë, ajo bëhet ose nuk pranohet fare.”
Në fund të dëshmisë, Dumani deklaroi se vendndodhjen e tij në Fier, në momentin e arrestimit, e kishte zbuluar pikërisht Suel Çela.
“Kur u plagosa, Sueli më tha ‘do të sjell doktorin’, pastaj mori me vete këtë (Hoxhajn). Më tha ‘do ta shofim’. Telefoni që përdora për të folur me Suelin ndodhet në prokurori dhe polici.”
