Sot në gjithë vendin numri i personave të vaksinuar ka arritur në 150 mijë. Deklarata u bë nga ministrja e Shëndetësisë, Ogerta Manastirliu, e cila nga Rrogozhina tha se tashmë aplikimi për tu vaksinuar mund të bëhet edhe nëpërmjet portalit e-Albania. Deri tani, Manastirliu tha se janë regjistruar 15 mijë kërkesa, të cilave pritet tu kthehet përgjigja.
“Ne sot do të arrijmë mbi 150 mijë vaksinime. Pra përfundojmë mbi 50% të dozave të ardhura deri më tani. Vijojmë me intensitet për të vaksinuar sa më shumë të moshuar dhe më pas për të zbritur edhe në fashën edhe grup-mosha të tjera.
Përveç thirrjes nga mjeku i familjes, të gjitha ata që nuk janë regjistruar ende, portali e-Albania tashmë funksionon dhe janë regjistruar 15 mijë kërkesa për vaksinim, të cilave do t’iu kthehet përgjigje për vijimin e këtij procesi”, u shpreh Manastirliu.
Ministrja e Shëndetësisë vijoi deklaratën e saj duke thënë se vaksinimi do të bëhet edhe në orët e pasdites. “Qendrat do të vijojnë të jenë të hapura edhe pasdite, derisa të ketë mbaruar qytetari i fundit. Ky është një proces që e ka marrë tashmë rrugën e vet dhe nuk do të ndalemi”.
Ndërkohë ditën e djeshme janë kryer 19.525 vaksinime. Që prej fillimit të vaksinimit janë kryer në total 138.846 doza të para dhe të dyta të vaksinës ndaj COVID-19.
