Disa ditë më parë kryeministri Edi Rama parlajmëroi ndryshime në Kodin Penal në kuadër të masave për parandalimin e përhapjes së koronavirusit, duke parashikuar dënimin me 15 vite burg për ata që thyejnë karantinën.
Ditën e sotme 30 Organizatat e Shoqërisë Civile kanë dalë kundër ashpërsimit të masave nga qeveria në kuadër të parandalimit të përhapjes së COVID-19, duke i kërkuar Kuvendit mosmiratimin e ndryshimeve të Kodit Penal dhe Rrugor.
Në një letër publike për Kuvendin, organizatat kërkojnë që të mos miratohen ndryshimet për dënimin me 15 vite burg për ata që thyejnë karantinën, pasi sipas tyre cenohen të drejtat dhe liritë themelore të shtetasve.
“Propozimet ligjore parashikojnë dënime tejet të ashpra që shkojnë deri në 15 vite burg dhe cenojnë dinjitetin njerëzor”, thuhet mes të tjerash në argumentimin e organizatave.
Ata shprehen se parimi i humanizmit dhe respektimit të dinjitetit njerëzor i sanksionuar që në preambulën e Kushtetutës së Republikës së Shqipërisë duhet të mbizotërojë mbi çdo nismë që shqyrtohet në Kuvend, aq më tepër në kushtet e gjendjes së fatkeqësisë natyrore.
Së fundmi, rreth kësaj kërkese ka reaguar edhe kryeministri i vendit Edi Rama, i cili me anë të një statusi në Twitter, duke shkruar se shoqatat mund të bëjnë propozime konkrete në rast se kanë, pasi tërheqje mbrapa nga qeveria nuk do të ketë.
Më tej, kryeministri shkruan se çdo gjë po bëhet për të mbrojtur popullin dhe se nuk ka rrugë tjetër për t’u hapur pa rrezikuar të humbim gjithçka.
STATUSI I PLOTE
‘Shoqatat s’duan asgjë në Kodin Penal për mbrojtjen nga epidemia?!Po daljen e njerëzve nga shtëpia e duan?!Po rivënien në lëvizje të ekonomisë e duan?!Po rrezikun e infeksionit kur hapemi e kanë menduar?!E pra, nuk kemi rrugë tjetër për t’u hapur pa rrezikuar të humbim gjithcka!
Kështu që nëse kanë propozime konkrete për përmirësime bujrum pa humbur kohë, sepse s’mund të jemi i vetmi vend në planet që s’ka asgjë në Kodin Penal për të mbrojtur popullin nga kërcënimi i jetës, në kushtet e epidemisë! Përmirësime po, tërheqje as që bëhet fjalë fare.’-shkruan Rama.
Shoqatat s'duan asgjë në Kodin Penal për mbrojtjen nga epidemia?!Po daljen e njerëzve nga shtëpia e duan?!Po rivënien në lëvizje të ekonomisë e duan?!Po rrezikun e infeksionit kur hapemi e kanë menduar?!E pra, nuk kemi rrugë tjetër për t'u hapur pa rrezikuar të humbim gjithcka!
— Edi Rama (@ediramaal) April 10, 2020
