Të paktën 14 persona humbën jetën dhe mbi 100 të tjerë mbetën të plagosur pasi stuhitë me erë të fuqishme goditën Pakistanin qendror dhe verior, menjëherë pas një vale intensive të të nxehtit që kishte përfshirë vendin.
Fenomeni ekstrem përfshiu të shtunën pasdite dhe në mbrëmje provincat Punjab dhe Khyber-Pakhtunkhwa, si dhe kryeqytetin Islamabad, duke shkaktuar rrëzime pemësh dhe shtyllash elektrike.
Sipas autoriteteve, shumica e viktimave humbën jetën nga shembja e mureve dhe çative, ndërsa dy persona vdiqën pasi u goditën nga panelet diellore që u shkëputën nga erërat e forta. Një tjetër burrë u vra dhe tre persona të tjerë u plagosën nga rrufeja.
Zëdhënësi i autoritetit për menaxhimin e fatkeqësive në Punjab, Mazhar Hussain, konfirmoi se temperaturat ekstreme, që arritën mbi 45°C krijuan kushtet për formimin e këtyre stuhive të dhunshme.
“Kjo ishte një stuhi jashtëzakonisht e fortë, me erëra të shpejta dhe pluhur të dendur që e ulte ndjeshëm dukshmërinë,” deklaroi Hussain.
Pamjet që kanë qarkulluar në rrjete sociale tregojnë momente paniku, përfshirë një klip nga një avion që po tentonte të ulej në qytetin Lahore, ku pasagjerët dëgjohen duke bërtitur gjatë turbulencave. Avioni u devijua më pas drejt Karaçit.
Pakistanit, një nga vendet më të ekspozuara ndaj ndryshimeve klimatike, po përjeton gjithnjë e më shpesh mot ekstrem. Gjatë prillit dhe majit, Islamabadi u godit nga stuhi breshëri, një fenomen i rrallë, i cili shkaktoi dëme të mëdha në automjete dhe panele diellore.
Në disa zona të Punjabit, temperaturat në prill arritën deri në 46.5°C, ndërsa shkollat në provincat Punjab dhe Balochistan janë detyruar të mbyllen më herët për pushimet verore për shkak të vapës përvëluese.
