Të paktën 12 besimtarë dyshohet se kanë humbur jetën dhe shumë të tjerë janë plagosur pas një përplasjeje gjatë festivalit Kumbh Mela në Indinë veriore.
Incidenti ka ndodhur në qytetin e shenjtë Prayagraj, ku pelegrinët që po flinin buzë lumit janë shkelur nga turma të tjera besimtarësh që po kryenin zhytjen rituale në ujërat e shenjta.
Autoritetet kishin parashikuar se mbi 100 milionë njerëz do të merrnin pjesë në ditën më të madhe të larjes, një nga momentet kulmore të festivalit.
Besimtarët ishin mbledhur në bashkimin e lumenjve Gange, Yamuna dhe mitik Saraswati, në një ceremoni që konsiderohet veçanërisht e rëndësishme për hindusët, për shkak të një radhitjeje të rrallë të trupave qiellorë pas 144 vjetësh.
Menjëherë pas incidentit, një njësi e Forcës së Veprimit të Shpejtë, e specializuar për situata emergjente, u dislokua në vendngjarje për të ofruar ndihmë dhe për të kontrolluar situatën.
Kryeministri indian, Narendra Modi, ka komunikuar me kryeministrin e shtetit Uttar Pradesh, Yogi Adityanath, duke bërë thirrje për marrjen e masave të menjëhershme për mbështetjen e të prekurve nga ngjarja.
Festivali Maha Kumbh, i cili mbahet çdo 12 vjet dhe njihet si tubimi më i madh fetar në botë, nisi më 13 janar.
Organizatorët kanë parashikuar që gjatë gjashtë javëve të tij do të marrin pjesë mbi 400 milionë pelegrinë.
Për të përballuar këtë fluks të madh njerëzish, autoritetet kanë ndërtuar një qytet të përkohshëm me tenda përgjatë brigjeve të lumit, të pajisur me 3,000 kuzhina, 150,000 tualete dhe 11 spitale.
