Skandali i 119 kg kokainë të sekuestruara në një nga magazinat e kompanisë “ZICO Sh.A”, në Vaqarr vijon më tej, teksa i arrestuar është Marson Murataj. Ky i fundit i cili ka të njëjtin mbiemër me pronarin e kompanisë “ZICO Sh.A”, njohur ndryshe në reklama televizive si “Bana King”, është një emër shumë i njohur për Policinë e Shtetit.
Mësohet se Marson Murataj, i punësuar si krye-menaxher i pritjes së kontejnerëve në Durrës, në kompaninë e Trifon Murataj merret me transportin e bananeve në magazina, shpërndarjen e tyre tek konsumatori, madje merret edhe me pagesën e reklamave televizive. Marson Murataj njihet nga regjistrat e policisë si person me precedent penal, ndërsa akuzohet si grabitës me dhunë e hajdut biznesesh. Rruga e tij si plaçkitës ka nisur në momentin kur ai ishte vetëm 22-vjeç.
Ka qenë pikërisht 2 dhjetor 2008, koha kur Marsoni u kap duke vjedhur një qendër interneti në qytetin e Fierit. Në këtë grabitje ai nuk ishte vetëm por në bashkëpunim me 4 persona të tjerë, konkretisht Kiljan Gjeçi, Donald Bitraj, Marson Murataj, Xh. M. dhe Vendim Murataj, ku 3 prej të cilëve, sot janë punësuar si shoferë të firmës, “ZICO Sh.A”, ose siç njihet ndryshe edhe si “Bana King”, ndërsa ende nuk janë arrestuar.
Por Marson Murataj nuk është ndalur me kaq, pasi tre herë të tjera në vitet 2010-2013 është akuzuar si ideator grabitjesh me dhunë dhe për pjesëmarrje për pazare droge, me grupe shitësish në tre qytete të ndryshme të Shqipërisë, konkretisht Fier, Durrës e Tiranë.
