Gjatë ditës së sotme janë bërë 11 vite nga protesta e 21 Janarit, ku u vranë katër qytetarë të pafajshëm. Protesta ishte e thirrur asokohe nga kryeministri aktual, Edi Rama. Ndërkohë lidhur me këtë ngjarje tragjike ka reaguar gazetari Bledi Mane. Përmes një postimi në rrjetet sociale, Mane shkruan se katër të pafajshëm u vranë, ndërsa fajtorët janë të lirë. Ndër të tjera Mane ka thumbuar qeverinë socialiste lidhur me homazhet që kryen për tragjedinë, ndonëse ajo protestë u thirr nga vetë Edi Rama.
Postimi i plotë i gazetarit Bledi Mane:
21 janari/ NA HAPËT BARKUN ME AKTRIMIN AMATOR
***
U vranë 4 qytetarë të pafajshëm si rrallëherë më parë. Nuk u vranë fshehurazi por në sytë e mijëra protestuesve dhe në transmetim direkt në ekranet e televizioneve.
4 viktimat kanë 10 vjet që treten në varr, ish kryeministri Sali Berisha ende i gjallë dhe i pandëshkuar.
4 viktima të poshtëruara në varr, ish ministri i brendshëm Lulzim Basha ende i gjallë e i pandëshkuar. 4 viktima të kalbura nga padrejtësia nën tokë, mbi tokë prokuroria e vjetër, Spak-u i ri, gjykatat e reja asnjë dënim dhe ndëshkim deri tani.
4 viktimat kanë 10 vjet që gulçojnë nga plagët në varr, gardistët që i vranë bëjnë dever rrugëve të qytetit të lirë e të paprekshëm.
4 viktima kanë 10 vjet që u brehen kokallat nga krimbat e mortjes në varr, Edi Rama ka 10 vjet që mbledh qeverinë e partinë dhe shkon vendos lule e aktron në bulevard…
Aktrimi amator, lulet plastike, lotët fallco!
