11 shtetas të tjerë të huaj nga Egjipti, Turqia dhe Italia, si dhe shqiptarë të Kosovës, morën ditën e sotme nënshtetësinë shqiptare. Në ceremoninë e betimit, që u zhvillua në ambientet e Bashkisë së Tiranës, kryebashkiaku tha se është kënaqësi që shtetas të rinj i shtohen Shqipërisë, por sidomos Tiranës.
“Është një shenjë e një qytetit që po rritet dhe zakonisht unë vij këtu në tarracë ose për celebrime, për dasmat e martesat e reja, pra të familjeve të reja që krijohen ose zakonisht vij këtu për të bërë betimin e shtetasve të rinj shqiptarë që i bashkohen Republikës sonë dhe misionit për të kontribuar në një shtet të përbashkët dhe në një mision të përbashkët për më shumë progres e zhvillim për Shqipërinë”, u shpreh mes të tjerash Veliaj.
Në fund të fjalës së tij, Veliaj uroi shtetasit e rinj shqiptarë që tani e tutje do kontribuojnë në zhvillimin e vendit. “Me betimin e sotëm ju uroj një fillim të ri si shtetas shqiptarë dhe si njerëz që gjithashtu jeni pjesë jo vetëm e një pasaporte por pjesë e një kombësie e një steme, një misioni, pjesë e një lëvizje për ta bërë Shqipërinë një vend akoma më të zhvilluar”, përfundoi kryetari i Bashkisë së Tiranës.
Më pas, Veliaj lexoi formulën e betimit për 11 shtetasit që kanë fituar shtetësinë shqiptare, të cilët më pas nënshkruan edhe aktin e betimit…
