Si çdo mëngjes kreu demokrat Lulzim Basha, tashmë ndan me ndjekësit në rrjetet sociale “100 dështimet e Ramës”.
Edhe mëngjesin e sotëm, Basha thotë se Shqipëria është vendi në Rajon që ka përfituar më pak nga grantet e konektivitetit të BE-së. Teksa publikon një video në rrjetet sociale, Basha shkruan:
“Në vend që të konkurrojmë për fondet komunitare, Shqipëria ia ka besuar zhvillimin e infrastrukturës PPP-ve, të cilat kanë një kosto të lartë”.
Ndërkohë kreu i PD, kujton se nga zgjedhjet e 25 prillit na ndajnë edhe 32 ditë. Dje ai publikoi shifrat e koncesionit për “Check-up-in”.
Me anë të një “instastory” Basha thekson se sipas Kontrollit të Lartë të Shtetit koncesioni i “Check up-it” ka marrë 6 milionë euro për shërbime të pakryera.
“ 6milionë euro sipas KLSH-së. PPP-të po thithin fondet për shëndetësinë, duke lënë spitalet pa investime dhe mjekë pa rritje pagash.”, thuhet në videomesazhin e publikuar nga lideri opozitar, Lulzim Basha.
Kujtojmë se lideri opozitar një pjesë të fushatës e ka zhvendosur në rrjetet sociale, duke synuar një target-grup më të ri.
Gjithashtu Basha ka zhvilluar shumë takime në qytete të ndryshme, ku në shumicën prej tyre takimet janë zhndërruar në mitingje elektorale.
Përmendim këtu Kavajën, Shkodrën, Gjirokastrën e sëfundmi dhe Beratin. Grumbuj qytetarësh pa maska e pa distancë sociale kanë bërë që këto takime të krijojnë rrezik të shtuar në kohë pandemie.
