1 vit pas vrasjes së Klodian Rashës, gjatë orës policore, ende shumë pikëpyetje nuk janë zbardhur.
Hetimi 12 mujor nuk përcaktoi se kush e vendosi pistoletën mbi 200 metra larg nga vendi i vrasjes, që u aludua se i përkiste 25-vjeçarit të ndjerë.
Dyshimet mbi manipulimin e vendngjarjes kanë mbetur në vend numëro pasi pak javë më parë prokurori i çështjes Ardian Braho u shkarkua nga detyra për shkak të vettingut.
Sandër Lleshi, i cili ishte në detyrë asokohe Ministër i Mbrojtjes dha dorëheqjen nga posti që mbante.
Ndërkohë Ardi Veliu në kohën kur ndodhi ngjarja ka mbajtur pozicionin e Drejtorit të Përgjithshëm të Policisë së Shtetit.
Kujtojmë që pas vrasjes së Klodian Rashës, u zhvilluan nëj sërë protestash të dhunshme nga qytetarët, të cilët kërkonin drejtësi për viktimën dhe ishin të revoltuar ndaj figurave që përfaqësonin policinë e shtetit. Madje ndërkohë që një efektiv policie mbeti i plagosur në një nga protestat për Klodian Rashën, Ardi Veliu nuk e shikonte dorëheqjen si opsion të përshtatshëm.
Nëse Ardi Veliu do të kishte dhënë dorëheqjen, ky efektiv nuk do të ishte vënë përballë protestuesve të revoltuar për vrasjen e 25-vjeçarit.
Dorëheqja e Veliut pothuajse pas një viti, u tha se kishte një motiv tjetër atë “personal”, pasi u shpreh se dëshironte kohë që t’i përkushtohej familjes, veçanërisht fëmijëve që ishin në një moshë delikate të adoleshencës.
Me anë të një letre që u bë publike nga kryeministri Rama, Veliu tregonte arsyet e largimit, ku kryesorja ishte përkushtimi i familjes.
“Ne këto moment kam vendosur të mos kërkoj një mandat tjetër dhe t’ju ofroj dorëheqjen time për t’u përkushtuar më shumë familjes dhe fëmijëve që tani janë ne një moshë delikate e të cilëve ju kam munguar pafund këto katër vite”, argumentonte Veliu.
Por sërish Ardi Veliu ra në kontraditë me atë që deklaroi si motiv të dorëheqjes së tij nga pozicioni si drejtor i policisë së shtetit. Ish-drejtori i Përgjithshëm i Policisë së Shtetit, Ardi Veliu u emërua muajin e kaluar në postin e zv. ministrit të Infrastrukturës dhe Energjisë.
Duket paradoksale, pasi në vend që të merreshin masa ndaj tij si drejtor i përgjithshëm i policisë së shtetit, në kohën kur ndodhi ngjarja e Klodian Rashës, Veliu ngjit me shpejtësi shkallët e karrierës, duke “rrëmbyer” një pozicion të rëndësishëm në kabinetin e qeverisë Rama.
