Pas largimit të mbi 1 milion shqiptarëve nga vendi, Edi Rama i ka cilësuar shqiptarët si “copa mishi të freskët” për Evropën, duke thënë se “është një luftë për mish të freskët.” Sipas Ramës, “Evropa është e vjetër dhe ka nevojë për mish të freskët,” duke iu referuar të rinjve shqiptarë që kanë emigruar për shkak se nuk kanë parë mundësi në vendin e tyre.
Këto komente, Rama i bëri në panelin “Perspektiva Europiane e Ballkanit Perëndimor,” të zhvilluar në Aachen të Gjermanisë. Ai u shpreh:
“Faleminderit që më bëtë pyetjen më me kleçkë. Problemi që unë shoh është se Evropa e vjetër, me këtë dua të them Gjermania dhe vendet e tjera të mëdha, po vuajnë nga demografia, me gjithnjë e më pak fëmijë dhe një kërkesë gjithnjë e në rritje për krah pune. Kështu që është shndërruar në një luftë për mish të freskët, si të marrin të rinj nga ne që të vijnë këtu, sa më shumë të jetë e mundur.”
Rama theksoi se të rinjtë nga Ballkani Perëndimor nuk shihen më si problem:
“Për ta thënë siç është: ata janë më të preferuarit sepse janë të bardhë, dhe edhe kur janë myslimanë, përshtaten lehtë. Qofshin myslimanë apo të krishterë, ata janë mbi të gjitha evropianë dhe duan të jenë pjesë e Evropës.”
