Bëhet e ditur se 100 kg drogë mungojnë! Një ngarkesë e madhe – prej njëqind kilogramë kokainë – ka mbërritur në portin e Xhenovas, një pjesë e së cilës duket se ka qenë e destinuar për në sheshin e kryeqytetit. Ky është sfondi i rrëmbimit që ndodhi të shtunën e kaluar në kryeqytetin e Ligurisë, me përfshirjen e një shtetasi domenikan me banim në Carrara, Joel De Jesus Castillo Tapia, 34 vjeç. I riu përfundoi në pranga së bashku me shtetasin ekuadorian, Holger Ernesto Wila Quinonez, 42 vjeç.
Ata akuzohen se kanë mbajtur peng në makinë një italian, për të marrë informacione të dobishme për të gjurmuar drogën e vjedhur. Në ngjarje mendohet se mund të përfshijë edhe disa qytetarë shqiptarë. Ka mundësi që rrëmbimi të jetë zhvilluar në dy faza dhe të dy të arrestuarit të kenë menaxhuar vetëm të dytën. Pengmarrja u zbulua rastësisht pasi një patrullë policie nga Genova ndaloi për kontroll një makinë. Në bord ndodheshin dy të huajt, tani të arrestuar dhe një italian, i cili, pasi kishte zbritur nga makina gjatë kontrollit, u tha policëve me zë të ulët: Shyqyr që na ndaluat, do të më vrasin.
Ishte pengu ai që tregoi se rrëmbyesit po përpiqeshin të gjenin 100 kg kokainë të vjedhur. Mendohet se dikush kishte paguar tashmë një “parapagesë” të rëndësishme për kokainën që nuk mbërriti kurrë në destinacionin e tyre. Një nga të arrestuarit, Castillo Tapia, nuk kishte precedentë të mëparshëm, madje rezultonte se punonte si saldator i anijeve, i njëjti vend ku punonte një 35-vjeçar shqiptar, i arrestuar të shtunën e kaluar – po në Carrara –me një pistoletë të mbushur 7.65. Shqiptari që përfundoi në pranga, ende nuk ka dhënë një shpjegim për armën, që nuk kishte as numër serie. Ndërkohë që ndryshe nga domenikani, kishte historik në botën e drogës dhe të zhvatjejes.
