Dega e PD ka reaguar pas zgjedhjeve që Komisioni i Rithemelimit do të mbajë ditën e hënë për të zgjedhur kreun e ri.
Sipas PD Shkodër, ky proces synon të përçajë me tej partinë ndërsa thuhet se cilido që mbi interesin dhe sakrificën e demokratëve, ka vendosur interesin personal, do të gjykohet nga koha dhe demokratët.
Reagimi:
Të dashur demokratë Shkodran!
Procesi i shpallur nga të vetëdeklaruarit si Komisioni i Rithemelimit për diten e hënë, datë 25 prill 2022, nuk ka asgjë të përbashkët me proceset reformuese apo organizimin e Partisë Demokratike të degës Shkodër dhe aq më pak me zgjedhjet apo votën e lirë.
Procesi i nisur ka si synim vetëm përçarjen e thellë të Partisë Demokratike, përjashtimin e demokratëve që në këto 8 vite kanë kontribuar me përkushtim dhe kanë besuar tek vlerat e PD, duke u përballur me regjimin e Edi Ramës.
Asnjë tentativë për të na përçarë nuk do të funksionojë. Demokratët e sakrificave dhe të kontributeve kanë qëndruar dhe do të qëndrojnë të bashkuar rreth vlerave të PD, si gjithmonë për të kontribuar dhe jo për të përfituar. Ata nuk thyhen, nuk tërhiqen, nuk përdoren dot nga askush dhe aq më pak nuk nënshtrohen ndaj padrejtësive.
Me përgjegjësi të lartë para demokratëve, por dhe qytetarve Shkodranë,deklarojmë se asnjë proces përçarës nuk ka për të sjellë asnjë efekt për PD dega Shkodër. Për ne, bashkimi dhe jo përçarja është zgjidhja për ta bërë PD më të madhe, më të fortë dhe fituese. Çdo ditë do punojmë për këtë, me qëllimin final fitoren e PD.
Cilido që mbi interesin dhe sakrificën e demokratëve, ka vendosur interesin personal, do të gjykohet nga koha dhe demokratët. Çdokush që bëhet dhe organizon procese përjashtuese dhe përçarëse, do të ndjejë peshën e gjykimit të drejtë të demokratëve dhe turpin e dështimit.
Partisë Demokratike i duhet një proces reformues, i drejtë, reflektues, korrigjues, por mbi të gjitha gjithpërfshirës, që njeh dhe respekton kontributet dhe sakrificat e demokratëve, sepse PD i përket çdo demokrati dhe askush nuk mund të na mohojë të qënurit DEMOKRATË!
E VËRTERTA është me demokratët, me Partinë Demokratike!
Koha do i japë të drejtë demokratëve!
Zoti i bekoftë demokratët e Shkodrës dhe gjithë Shqipërisë!
